Сонэто 141

Чячё, кама́м мэ на якхэ́нца тут,

Дрэ тутэ бут шэла́ доша́ латхэ́н,

Миро́ ило́ кошэ́лпэ лэ́нца бут,

Тэ на́дыкхи бьянэ́л о камлыпэ́н.

Нанэ́ мирэ́ кана́, соб тыри чиб

Лэн гудлыпна́са го́жэс хохадя́,

Нанэ́ мри чиб, мро накх, мро васт, — коли́ б

Мэ ґалыём, ман со́са припхандя́н.

Со сарэпа́ндж мирэ́ чюибэна́?[85] —

Ило́ лэн на кандэ́ла екхоро́,

Паты́в-ладж нашавэ́ла, соб тэ на́

Чюрда́в тут, тыро ро́бо чёроро́.

Дрэ би́бахт мэ екх ко́фо дорэса́ва:

Мро грэ́хо — ту, ваш тукэ хасёва́ва.

Сонэто 142

О грэ́хо, со кама́м тут, на ивья́

Кошэ́са, — сы о грэ́хо адава́,

Нэ сы буты́р тыри́ дош адая́,

Дрэ тутэ кай латхэ́са патыва́?

Сом дрэ доша́, нэ мэк вушта́ тырэ́

Тэ на́ чюрдэн прэ ма́ндэ арманя́:

Лолэ́ — ладжя́тыр, совэля́ пхарэ́

Бангэ́с лэн чяравэ́на хоханя́.

Нанэ́ до грэ́хо, ту, сыр мэ, камэ́с

ваврэ́н, нэ тут, сыр ту ман, на камэ́на:

Коли́ бы ковлэды́р ту тэ явэ́с,

Ґалёв, и тукэ грэ́хи простинэ́на.

Коли́ сы тутэ со тэ гаравэ́с,

Ту про́стинэ, и тукэ дэн миштэ́с.

Сонэто 143

Сыр дэ́лпэ тэ ухты́лл э хуланы́,

Тэлэ́ змэки́ вастэ́ндыр тыкнорэ́с,

Каґня́, сави́ барья́тыр дур нашны́,

Соб ла тэ дэ́с про штэ́тыцо миштэ́с,

Э дай, э чяворэ́с тэлэ́ чюви́,

Мэк роиндо́й, праста́ла пирэ чяр

Тэ дорэсэ́л ада каґня́, сави́

Урня́ла ла́тыр, — чяворо́ прэ штар.

Коли́ со криг урня́ла, ухтылэ́са,

Тэ мэ, сыр чяворо́, кхара́в палэ́:

Кэ мэ палэ́ яв, коли́ дорэсэ́са,

Чюми́дэ ман, лэ дрэ васта́ ковлэ́.

Мэ тут манга́в: ухты́л, со ту камэ́с,

Рисёв, мро роибэ́н штылякирэ́с.

Сонэто 144

Дро мро ило́ прэ би́бахт и прэ бахт

Сы дуйджинэ́, дром ма́нгэ сыкавэ́н:

Лачё сы — мурш, шука́р ёв зорало́,

Холы́ — джювлы́, ёй сы о калыпэ́н.

Соб ман тэ дэ́с дро а́до, шукарны́

Злыджя́ла гожыпна́са мрэ лачес,

Камэ́л тэ парувэ́л да бэнгланы́

Э свэнтонэ́с, соб тэ кэрэ́л бэнгэ́с.

Сыр ада мурш ячелпэ парудо́,

Ґалёв, прэ ма́ндэ ёв, сыр ёй, уштэ́ла;

Сы машкир лэ́ндэ ми́ро куч скэрдо́,

Ваврэ́скэ ж ка́жно а́до рикирэ́ла.

Кон сы лачё, кана́ на ґалёва́ва,

Жыка́й ваврэ́с дро а́до на дыкха́ва.

Сонэто 145

Куч камлыпэ́н скэрдя́ вушта́.

Пхэндлэ́ екх ма́нгэ: «На́дыкхав!» –

Мро ди́ рики́рна ангушта́:

Дыкхи, даратыр, хай, мэрав,

Пожалиндя́ ман чёрорэ́с:

Сыр англэды́р э чиб пхэндя́,

Буты́р ваш ма́нгэ гудлорэ́с

О лав кирко ёй парудя́:

«Мэ на́дыкхав!»… — Тэ рат калы́

Татэ кхамэ́са традыны́,

Латэ якхэндыр криг нашлы́,

Сыр тэлэ пхув сыс чюрдыны́:

«Мэ на́дыкхав!..» — холя́са ёй, –

«…на тут,» — тэ ман зракхья́ одо́й!

Сонэто 146

Чёроро́ ди́, кай грэ́хи мрэ́ дживэ́н,

Тырдэ́на тут про дром о хохано́:

Соб тэ чялякирэ́с бокхалыпэ́н,

Соб тэ макхэ́с куч, со дура́л дыкхно́.

Палсо́ ваврэ́скро кхэр дро кучипэ́н

Ту рикирэ́са пал ловэ́ барэ́?

Коли́ кирмэ ивья́ саро́ залэ́н,

Чюрдэ́н пирэ балва́л бутя́ тырэ́.

Джив пр адава́, со кэ́рна бутджинэ́,

Тхо́в кхэтанэ́ саро́ дро миштыпэ́н,

Кин шэлбэрша́ пал дывэса́ кирнэ́,

Яв пфуй — явря́л, андрэ́ — дро чялыпэ́н.

Чёр мэрибна́стыр, манушэ́ндыр — ёв,

Мэрэ́ла мэрибэ́н, ту на́ хасёв!

Сонэто 147

Кама́м, сом дрэ здраны́, дава́ родав,

Со састяки́рла мро насвалыпэ́н,

Дукх закэдэ́ла, дэ́ла со тэ хав,

Соб забистра́вас мро бокхалыпэ́н.

Мэк тэ састякирэ́л ман мри годы́! –

Холя́сыя, со ла мэ на канда́ва,

Гэя́ аври́, годы сы нашады́,

Сыр тэ мэрав, кана́ дужакира́ва.

Гэя́ годы, кэрдя́ вастэ́са: «Яв!»

Мэ, бигодя́киро, кана́ на кхинёва́ва,

Трада́ва дылныпэ́н лав пало лав,

Про чячипэ́н чиба́са попэра́ва.

Совлахадём: ёй сы жужы́, шука́р,

Нэ сыр э рат — калы́, пфуй — сыр э дар.

Сонэто 148

Палсо́ якха́, дыкхи́ начячюнэ́с,

Дро мро ило́ мэклэ́ о камлыпэ́н?

Палсо́ мири́ годы́, ило́ миштэ́с

На лэ́нас лэс аври́ тэ вытрадэ́н?

Коли́ дава́ шука́р ваш мрэ якха́,

Палсо́ кошэ́ла свэ́тыцо саро́?

Екх дош тыкны́, ками́, мэ на латха́в,

Кай бут локхэ́с латхэ́ла годьваро́.

Нашты́, соб ман якха́ тэ хохавэ́н,

Ками́, ёнэ́ сы парудэ́ ясвэ́нца,

Сы ґалыно́, палсо́ пхарэ́с дыкхэ́н,

Сыр кхам, коли́ сы закэрдо́ тученца.

О камлыпэ́н, фрэнтари адава́,

О грэ́хи гаравэ́на дрэ ясва́.

Сонэто 149

Пхэ́н, холямы́, хай, на кама́м мэ тут,

Коли́ мэ кокорэ́с пэс хаськира́ва.

Пал тутэ, пхэ́н, на думина́ва бут,

Коли́ мэ пэс ваш тукэ забистра́ва.

Мро вро́го, сыр конэ́с ту на камэ́с,

Кон на пиро ило́, лэс на́дыкхав,

Коли́ ту ман костя́н начячюнэ́с,

Мэ ра́до со́мас пэс тэ умара́в.

Сави́ бари́ паты́в латха́ва мэ,

Соб тэ на́ тэрдёва́в кэ ту сыр ро́бо?

Коли́ кама́м адя́кэ, хасимэ́,

Тырэ́ кирнэ́ якха́ канда́вас со́бы!

Дрэ три холы́ кэ мэ сы екхоро́:

Камэ́с, соб тэ дыкхэ́н, мэ — короро́.

Сонэто 150

Катхы́р, мри бизорья́кири, да зор,

Соб дро миро́ ило́ тэ раинэ́с?

Соб тэ патя́в, мэк хохавэ́са, хор,

Тэ совлаха́в, хай, сы кало́ — дывэ́с.

Сыр парувэ́са ту саро́ кирнэ́с?

Зор биладжя́кири тыри́ катхы́р,

Со дрэ мири́ годы́ ту сыкавэ́с

О кучипэ́н сарэ́ндыр гожэды́р?

Кон тут сыклякирдя́, соб тэ барьёл

Ваш тукэ мрэ холя́са камлыпэ́н?

Сарэ́ раки́рна, хай, ничи́ на мо́л,

Ками́ манга́ва, на́ шун ту ваврэ́н.

Сыр да барьякирэ́л тро кирныпэ́н,

Буты́р сарэ́ндыр мо́л мро камлыпэ́н.

Сонэто 151

О камлыпэ́н — тэрно́, соб тэ ґалёл

Э ладж, мэк сы, ґалёв, чяй лэ́скири.

Мирэ́ доша́ (ман тэ кошэ́с на мо́л) -

Шукарипэ́н тыро́, мри гудлори́.

Ту хохавэ́сас, тэ адя́кэ ж мэ

Мро ди́ мирэ́ масэ́са хохава́вас,

Мас хохадя́ оди́ нахасимэ́,

Тэ мэ дрэ дылынэ́ндэ ачява́вас.

Шуна́в тро лав, ґаздэ́лпэ ладж мири́,

Тэрды́ учес, прэ тутэ сыкавэ́ла,

Сыс пхутькирды́ пашэ раны́ бари́,

Тэ традыны́ аври́ — тэлэ́ пэрэ́ла.

Кон сыс дро камлыпэ́н тэла́л-упра́л,

Ёв ґалыя́ миштэ́с, сыр ладж тэ хал.