23 И будут царие кормителие твои, и княгини их кормилицы твоя: до лица земли поклонятся тебе и прах ног твоих оближут, и увеси, яко аз Господь Бог, и не посрамятся терпящии мя.

24 Еда возмет кто от исполина корысти? и аще кто пленит неправедне, спасетлися?

25 Зане тако глаголет Господь: аще кто пленит исполина, возмет корысти: вземляй же от крепкаго спасется: аз же прю твою разсужду и аз сыны твоя избавлю:

26 и оскорбившии тебе снедят плоть свою и испиют яко вино ново кровь свою, и упиются: и увесть всяка плоть, яко аз Господь избавивый тя и заступаяй крепость иаковлю.

Глава 50

1 Тако глаголет Господь: кая книга отпущения матере вашея, еюже отпустих ю? или коему заимодавцу продах вы? се, грехми вашими продастеся, и беззаконий ради ваших отпустих матерь вашу.

2 Что яко приидох, и не бяше человека? звах, и не бе послушающаго? еда не может рука моя избавити, или не могу изяти? се, запрещением моим опустошу море и положу реки пусты, и изсхнут рыбы их не сущей воде и умрут жаждею:

3 облеку небо во тму и положу аки вретище одежду его.

4 Господь Господь дает мне язык научения, еже разумети, егда подобает рещи слово: положи мя утро утро, приложи ми ухо, еже слышати,

5 и наказание Господне отверзает ушы мои: аз же не противлюся, ни противоглаголю.

6 Плещы мои вдах на раны и ланите мои на заушения, лица же моего не отвратих от студа заплеваний,

7 и Господь Господь помощник ми бысть: сего ради не усрамихся, но положих лице свое аки твердый камень и разумех, яко не постыждуся:

8 зане приближается оправдавый мя. Кто пряйся со мною? да сопротивостанет мне купно. И кто судяйся со мною? да приближится ко мне.

9 Се, Господь Господь поможет ми: кто озлобит мя? Се, вси вы яко риза обетшаете, и яко молие изяст вы.

10 Кто в вас бояйся Господа? да послушает гласа отрока его. Ходящии во тме, и несть им света, надейтеся на имя Господне и утвердитеся о Бозе.

11 Се, вси вы огнь раждизаете и укрепляете пламень: ходите светом огня вашего и пламенем, егоже разжегосте. Мене ради быша сия вам, в печали успнете.

Глава 51

1 Послушайте мене, гонящии правду и взыскающии Господа, воззрите на твердый камень, егоже изсекосте, и в юдоль потока, юже ископасте.

2 Воззрите на авраама отца вашего и на сарру породившую вы: яко един бе, и призвах его, и благослових его, и возлюбих его, и умножих его.

3 И тебе ныне утешу, сионе, и утеших вся пустыни его, и поставлю пустыню его яко рай, и яже ко западом его аки рай Господень: радость и веселие обрящут в нем, исповедание и глас хваления.

4 Послушайте мене, людие мои, послушайте, и царие, ко мне внушите: яко закон от мене изыдет, и суд мой во свет языком.

5 Приближается скоро правда моя, и изыдет яко свет спасение мое, и на мышцу мою языцы надеятися будут: мене острови ожидати и на мышцу мою уповати будут.

6 Воздвигните на небо очи ваши и воззрите на землю долу, понеже небо яко дым утвердися, и земля яко риза обетшает, живущии же на земли якоже сия изомрут, спасение же мое во век будет, и правда моя не оскудеет.

7 Послушайте мене, ведящии суд, людие мои, имже закон мой в сердцы вашем, не бойтеся укорения человеча и похулению их не покаряйтеся.

8 Якоже бо риза снедена будет временем, и яко сукно изястся мольми, правда же моя во веки будет и спасение мое в роды родов.

9 Востани, востани, Иерусалиме, и облецыся во крепость мышцы твоея, востани яко в начале дне, яко род века: не ты ли еси победил гордаго и расторгнул змиа?

10 Не ты ли еси опустошаяй море, воду бездны многу? положивый глубины морския путь прохода изятым и избавленым?

11 Господем бо возвратятся и приидут в сион с радостию и со веселием вечным: на главе бо их веселие и хвала, и радость приимет я: отбеже болезнь и печаль и воздыхание.

12 Аз есмь, аз есмь утешаяй тя: разумей, кто сый убоялся еси человека смертна и сына человеча, иже яко трава изсхоша,

13 и забыл еси Бога создавшаго тя, сотворшаго небо и основавшаго землю: и боялся еси присно во вся дни лица ярости стужающаго тебе: како бо восхоте взяти тя, и ныне где ярость стужающаго тебе?

14 Внегда бо спастися тебе, не станет, ниже умедлит:

15 яко аз Бог твой, возмущаяй море и творяй шум волнам его: Господь саваоф имя мне.

16 Положу словеса моя во уста твоя и под сению руки моея покрыю тя, еюже поставих небо и основах землю: и речет сиону: людие мои есте вы.

17 Востани, востани, воскресени, Иерусалиме, испивый чашу ярости от руки Господни: чашу бо падения, фиал ярости испил и истощил еси,

18 и не бысть утешаяй тебе от всех чад твоих, яже родил еси, и не бысть подемлющаго руки твоея, ниже от всех сынов твоих, ихже вознесл еси.

19 Два сия противна тебе, кто сожалеет тебе? падение и сокрушение, глад и мечь, кто утешит тя?

20 Сынове твои обнищавшии, седяще на краи всякаго исхода, яко свекла недовареная, исполнени ярости Господни, разслаблени Господем Богом.

21 Сего ради слыши, смиренный и упивыйся не вином:

22 тако глаголет Господь Бог судяй людем своим: се, взях от руки твоея чашу падения, фиал ярости моея, и не приложиши ксему пити ея:

23 и вложу ю в руце преобидевших тя и смиривших тя, иже рекоша души твоей: преклонися, да минем: и положил еси равно земли плещы твоя отвне мимоходящым.

Глава 52

1 Востани, востани, сионе, облецыся во крепость твою, сионе, и ты облецыся во славу твою, Иерусалиме, граде святый, ктому не приложит проити сквозе тя необрезанный и нечистый.

2 Истряси прах и востани, сяди, Иерусалиме, совлецы узу выи твоея, плененая дщи сионя.

3 Яко сия глаголет Господь: туне продани бысте, и не сребром избавитеся.

4 Тако глаголет Господь: во египет снидоша людие мои прежде, еже пришелцем быти тамо, и во ассирию нуждею отведошася.

5 И ныне что зде есте? сия глаголет Господь: яко взяшася людие мои туне, чудитеся и плачитеся. Тако глаголет Господь: вас ради присно имя мое хулится во языцех.

6 Сего ради познают людие мои имя мое в той день, яко аз есмь сам глаголяй, ту есмь.

7 Коль красны на горах ноги благовествующих мир, благовествующих благая, яко слышано сотворю спасение твое, глаголя: сионе, воцарится Бог твой.

8 Яко глас хранящих тя вознесеся, и гласом вкупе возрадуются: яко очи ко очесем воззрят, егда помилует Господь сиона.

9 Да отрыгнут веселие вкупе пустыни Иерусалимския, яко помилова Господь людий своих и избави Иерусалима:

10 и открыет Господь мышцу свою святую пред всеми языки, и узрят вси концы земли спасение, еже от Бога нашего.

11 Отступите, отступите, изыдите отсюду и нечистоте не прикасайтеся, изыдите от среды его, отлучитеся, носящии сосуды Господни:

12 яко не с мятежем изыдете, ниже убежанием пойдете: пойдет бо пред вами Господь, и собираяй вы Господь Бог израилев.

13 Се, уразумеет отрок мой и вознесется и прославится зело.

14 Якоже ужаснутся о тебе мнози, тако обезславится от человек вид твой, и слава твоя от сынов человеческих.

15 Тако удивятся языцы мнози о нем, и заградят царие уста своя: яко, имже не возвестися о нем, узрят, и иже не слышаша, уразумеют.

Глава 53

1 Господи, кто верова слуху нашему, и мышца Господня кому открыся?

2 Возвестихом, яко отроча пред ним яко корень в земли жаждущей, несть вида ему, ниже славы: и видехом его, и не имяше вида, ни доброты:

3 но вид его безчестен, умален паче всех сынов человеческих: человек в язве сый и ведый терпети болезнь, яко отвратися лице его, безчестно бысть, и не вменися.

4 Сей грехи нашя носит и о нас болезнует, и мы вменихом его быти в труде и в язве от Бога и во озлоблении.

5 Той же язвен бысть за грехи нашя и мучен бысть за беззакония наша, наказание мира нашего на нем, язвою его мы изцелехом.

6 Вси яко овцы заблудихом: человек от пути своего заблуди, и Господь предаде его грех ради наших.