26 Ты же помяни, и да судимся: глаголи ты беззакония твоя прежде, да оправдишися.
27 Отцы ваши первии согрешиша, и князи ваши беззаконноваша на мя.
28 И оскверниша князи святая моя, и дах погубити иакова и израиля во укоризну.
Глава 44
1 Ныне же слыши, рабе мой иакове, и израилю, егоже избрах.
2 Сице глаголет Господь Бог сотворивый тя и создавый тя из утробы: еще поможет ти: не бойся, рабе мой иакове, и возлюбленный израилю, егоже избрах.
3 Яко аз дам воду в жажду ходящым в безводней, наложу дух мой на семя твое и благословения моя на чада твоя,
4 и прозябнут аки трава посреде воды и яко верба при воде текущей.
5 Сей речет: Божий есмь: и сей возопиет о имени иаковли, и другий напишет рукою своею: Божий есмь: и о имени израилеве возопиет.
6 Сице глаголет Бог Царь израилев, и избавлей его Бог саваоф: аз первый и аз по сих, кроме мене несть Бога:
7 кто якоже аз? да станет и да призовет, и да возвестит и да уготовит ми, отнележе сотворих человека во век, и грядущая прежде неже приити им, да возвестят вам.
8 Не укрывайтеся, ниже заблуждайте: не исперва ли внушисте, и возвестих вам? свидетелие вы есте, аще есть Бог разве мене.
9 И не послушаша тогда созидающии, и ваяющии вси тщетни, творящии желания своя, яже не упользуют их:
10 но посрамятся вси созидающии бога и ваяющии вси неполезная.
11 И вси, отнюдуже быша, изсхоша: и глусии от человек да соберутся вси и да станут вкупе, и да посрамятся и устыдятся вкупе.
12 Яко наостри древоделатель сечиво, теслою содела оное, и свердлом состави е, и длатом издолбе е, и содела е крепостию мышцы своея: и взалчет, и изнеможет, и не напиется воды.
13 И избрав древоделя древо, постави в меру, и клеем сострои е, и сотвори е аки образ мужеск и аки красоту человечу, поставити е в дому.
14 Посече древо в дубраве, еже насади Господь, сосну, и дождь возрасти,
15 да будет человеком на жжение: и взяв от него, согреся, и изжегше я, испекоша ими хлебы, из оставшаго же сотвориша боги и покланяются им: сотвори е изваянное, и прекланяется им.
16 Пол его сожже огнем, и пол его сожже на углие, и испече в них хлебы, и на них испече мясо, и яде, и насытися, и согревся рече: сладко мне, яко согрехся и видех огнь.
17 Из оставшаго же сотвори бога изваянна, прекланяется ему и покланяется, и молится ему глаголя: избави мя, яко бог мой еси ты.
18 Не уведаша смыслити, яко отемнеша очи их еже видети и разумети сердцем своим.
19 И не помысли в души своей, ни уведе смышлением, яко пол его сожже огнем, и испече на углиех его хлебы, и испек мяса снеде, и оставшее его в мерзость сотвори, и покланяются ему.
20 Увеждь, яко пепел есть сердце их, и прельщаются, и ни един может души своея избавити: видите, не рцыте, яко лжа в деснице моей.
21 Помяни сия, иакове и израилю, яко раб мой еси ты, сотворих тя раба моего, и ты, израилю, не забывай мене.
22 Се бо, отях яко облак беззакония твоя и яко примрак грехи твоя: обратися ко мне, и избавлю тя.
23 Возвеселитеся, небеса, яко помилова Бог израиля: вострубите, основания земная, возопийте, горы, веселие, холми и вся древеса, яже на них: яко избави Бог иакова, и израиль прославится.
24 Сице глаголет Господь избавляяй тя и создавый тя от чрева: аз Господь совершаяй вся, распрострох небо един и утвердих землю.
25 Кто ин разсыплет знамения чревоволшебников и волшбы от сердца, отвращаяй мудрыя вспять и советы их обуяяй,
26 и уставляя глагол раба своего, и совет вестников своих истинен творяй? глаголяй Иерусалиму: населишися: и градом иудейским: возградитеся, и пустыни его просияют,
27 глаголяй бездне: опустееши, и реки твоя изсушу,
28 глаголяй киру смыслити, и вся воли моя сотворит: глаголяй Иерусалиму: возградишися, и храм святый мой осную.
Глава 45
1 Сице глаголет Господь Бог помазанному моему киру, егоже удержах за десницу, повинути пред ним языки, и крепость царей разрушу, отверзу пред ним врата, и гради не злтворятся:
2 аз пред тобою пойду и горы уравню, врата медяная сокрушу и вереи железныя сломлю,
3 и дам ти сокровища темная сокровенная: невидимая отверзу тебе, да увеси, яко аз Господь Бог твой прозывая имя твое, Бог израилев.
4 Ради раба моего иакова и израиля избраннаго моего, аз прозову тя именем твоим и прииму тя:
5 ты же не познал еси мене, яко аз Господь Бог, и несть разве мене еще Бога: укрепих тя, и не познал еси мене,
6 да быша уведели, иже от восток солнечных и иже от запад, яко несть Бог разве мене: аз Господь Бог, и несть еще.
7 Аз устроивый свет и сотворивый тму, творяй мир и зиждяй злая, аз Господь Бог, творяй сия вся.
8 Да возрадуется небо свыше, и облацы да кропят правду: да прозябнет земля, и да прорастит милость, и правду да прозябнет вкупе: аз есмь Господь создавый тя.
9 Что лучшее устроих яко глину скудельничу? еда оряй орати будет землю весь день? еда речет брение скудельнику: что твориши, яко не делаеши, ниже имаши рук? еда отвещает здание создавшему е?
10 еда глаголет отцу: что родиши? и матери: что чревоболиши?
11 Яко тако глаголет Господь Бог, святый израилев, сотворивый грядущая: вопросите мене о сынех моих и о дщерех моих, и о делех руку моею заповедите мне.
12 Аз сотворих землю и человека на ней, аз рукою моею утвердих небо, аз всем звездам заповедах.
13 Аз возставих его со правдою царя, и вси путие его правы: сей созиждет град мой и пленение людий моих возвратит, не по мзде, ни по даром, рече Господь саваоф.
14 Тако глаголет Господь саваоф: утрудися египет и купли ефиопския, и саваимстии мужие высоцыи к тебе прейдут и тебе будут раби, и вслед тебе пойдут связани узами ручными, и прейдут к тебе и поклонятся тебе, и в тебе помолятся, яко в тебе Бог есть, и рекут: несть Бога разве тебе:
15 ты бо еси Бог, и не ведехом, Бог израилев спас.
16 Постыдятся и посрамятся вси противящиися ему и пойдут в студе: обновляйтеся ко мне, острови.
17 Израиль спасается от Господа спасением вечным: не постыдятся, ни посрамятся даже до века ктому.
18 Зане тако глаголет Господь сотворивый небо, сей Бог показавый землю и сотворивый ю, той раздели ю, не вотще сотвори ю, но на вселение созда ю: аз есмь Господь, и несть ктому.
19 Не отай глаголах, ни в темне месте земли: не рекох племени иаковлю: суетнаго взыщите. Аз есмь, аз есмь Господь глаголяй правду и возвещаяй истину.
20 Соберитеся и приидите, совещайтеся вкупе, спасаемии от язык. Не разумеша воздвижущии древо изваяние свое и молящеся богом, иже не спасают.
21 Аще возвестят, да приближатся, да уведят вкупе, кто слышана сотвори сия исперва? Тогда возвестися вам: аз Бог, и несть иного разве мене, праведен и спаситель, несть кроме мене.
22 Обратитеся ко мне и спасетеся, иже от края земнаго: аз есмь Бог, и несть иного.
23 Кленуся мною самим, аще не изыдет изо уст моих правда, словеса моя не возвратятся: яко мне поклонится всяко колено, и исповестся всяк язык Богови, глаголя:
24 правда и слава к нему приидет: и посрамятся вси отлучающиися.
25 От Господа оправдятся, и о Бозе прославится все семя сынов израилевых.
Глава 46
1 Паде вил, сокрушися дагон, быша ваяния их во звери и скоты: носите я связана яко бремя труждающемуся и разслабевшу,
2 и алчущу и не могущу вкупе, иже не возмогут спастися от рати, сами же пленени приведошася.
3 Послушайте мене, доме иаковль и весь останок израилев, носимии от чрева и наказуемии от детска даже до старости:
4 аз есмь, и дондеже состареетеся, аз есмь, аз терплю вам, аз сотворих и аз понесу, аз подиму и спасу вы.
5 Кому мя уподобисте? видите, ухитрите, заблуждающии,
6 слагающии злато из меха, и сребро весом поставляют в мериле, и наемше златаря сотвориша рукотворенная, и преклоншеся покланяются им:
7 воздвижут я на рамех и ходят: аще же положат я на месте своем, ту лежат, ниже подвижутся: и иже аще возопиет к ним, не услышат, от бед не спасут его.