Молитва князя Володимера.

Володимир князь, отходя света сего, сице моляшеся, глаголя: «Господи Боже мои, не познал Тебе бях, но помиловал мя еси и святым крещением просветил мя еси, и познах Тя, Боже всех, святыи Творче всея твари, Отче Господа нашего Исуса Христа. Слава Ти [с] Сыном и Святым Духом! Владыко Боже, не помяни моей злобы, не знал есмь Тебе в поганьстве, ныне же Тя знаю и виде; Господи Боже мои, помилуй мя. Аще мя хощеши казнити и мучити за грехы моя, казни сам мя, Господи, бесом не предай же мене». И сице глаголя и моляся Богу, преда душю свою с миром ангелом Господним и успе. Праведных бо души в руку Божию суть, и мъзда им от Господа и строение им от Вышняго; того ради приимуть венець красоты от руку Господню. По святем же крещении поживе блаженыи князь Володимир 28 лет. На другое ле[то] по крещении к порогом ходи, на третьее Корсунь город взя, на четвертое лето церковь камену Святыа Богородица заложи, а на пятое лето Переяславль заложи, в девятое лето десятину блаженыи христолюбивый князь Володимир вда церкви Святей Богородице и от имениа своего. О том бо и сам Господь рече: «Идеже есть скровище ваше, ту и сердце ваше будеть»; блаженыи князь Володимир имяше скровище свое на небесех, ськрыв милостынею и добрыми своими делы: тамо и сердце его бе в царствии небеснем. И Бог поможе ему, и седе в Киеве, на месте отца своего Святослава и деда своего Игоря. А Святослава князя печенези убиша; а Ярополк седяше в Киеве на месте отца своего Святослава, и Олег идыи с вой, у Вруча града мост ся обломи с вой, и удавиша Олга в гребли, а Ярополка убиша в Киеве мужи Володимерове. И седе в Киеве князь Володимер в осмое лето по смерти отца своего Святослава, месяца июня в 11, в лето 6486 (978). Крести же ся князь Володимир в 10-е лето по убьении брата своего Ярополка. Каашется и плакашется блаженыи князь Володимир всего того, елико створи в поганьстве, не зная Бога. Познав же Бога истиннаго, Творца небесе и земли, покаявся всего, и отвръжеся дьавола и бесов и всея службы его, и послужи Богу добрыми делы своими и милостынею. Успе с миром месяца июля в 15 день, в лето 6523 (1015) о Христе Исусе Господемь на[шимь].

Проложное Житие князя Владимира издавалось неоднократно по различным спискам. Ниже печатается один из наиболее ранних и авторитетных списков Жития по пергаменному Прологу первой половины XIV в. (РГАДА- Ф- 381, № 173. Л. 162 об. — 163 об.). Житие читается под 15 июля, днем памяти святого князя.

В тъ же день успение блаженаго князя Володимира, крестившаго[147] Рускую землю.

Сь бысть сын Святославль от племене варяжьска князь Володимир, пьрвое к идолом много тыцание творя по отчю преданию. Да егда Бог въсхоте собе избьрати люди новы, въдъхну в сего благодать Святаго Духа. И възбну акы от сна от лютаго идолослужения, и посла по всем языком, испытая закон их, како верують, и уведев святую гречькую веру, яко свещю на светиле, и рече в собе: «Сице створю, пойду в землю их и пленю грады их и обрящю учителя». Да еже умысли, то и створи. Шед, взя Кърсунь и посла к цесарю грецкому, глаголя: «Дай за мя сестру свою, аще ли не даси, створю граду твоему яко и сему створих». Он же отвеща: «Несть еде таковаго обычая крестьяном даяти за поганыя. Аще ли ся крьстишь, то и се получиши, и вяще сего царство небесное». И рече Володимир: «Тако створю. Пришедъше от тебе с цесарицею крестять мя». И в то время въпал бяше Володимир в недуг лют обема очима. И рече пославши цесарица к нему: «Аще не крестишься, не избудеши болезни сея». Он же рече: «Крестите мя, ибо на то вы еемь призвал». И егда крестиша и, створися чюдо велие: въшедъшю бо ему в святую купель, и отвьрзостася ему очи, и // (л. 163) бысть акы николи не имев недуга. Прозрев, похвали всех Бога и просвещен быв, радовашеся душею и теломь. И пришел Кыеву, изби вся идолы: Перуна, Хърса, Дажьбога и Мокошь и прочая вся кумиры. Посемь съзва все множьство людии и заповеда им креститися, нарек им день, рек: «Аще кто не обрящеться утро на реце, тъ будеть противьник мне». И сниде на Почаину реку всь въздраст мужь и жен и младеньци. Съвершении же стояху в воде, ови до пояса, инии до выя, а друзии бродяху, а прозвутери, по брегу стояще, молитвы глаголаху, яко над крестимыми. И оттоле наречеся место святое, идеже ныне цьркы есть Петрова, и тъ бысть пьрвыи ходатаи нашему спасению. Володимир же възрев на небо, помолися за крестьяны, глаголя: «Призри на новопросвещеныя люди сия и дажь им, Господи, уведети Тебе, истиньнаго Бога, утвьрди в них правую веру и мне помози, Господи, на супостатьныя врагы, да надеяся на Твою дьржаву, поперу къзни его». Повеле же людьм ставите церкви по всем градом, а сам създа церковь Святую Богородицю, удивив. Пребыв же неколико лет, нача болети и преставися к Богу месяца июля 15 день. Тело же его положиша в церкви Святыя Богородица, юже сам създа. И плакася его все множьство людии: бояре акы отца, люди акы заступника, сироты акы помощника, нищий и вдовице яко печалника и кърмителя.

Да како тя възможем по достоянию похвалите, створьшаго де(л. 163 об.)ло равьно апостолом. Хвалить убо Римьская земля Петра и Павла, Асья Иоана Богословьца, Егюпьтьская Марка, Антиохииская Луку, а Грецкая Андрея. Вся же Русьская земля тебе, Володимире, яко Господня апостола, мольбными песньми память твою празднующе. Похвалныя веньца приносим ти, глаголюще: Радуйся, Володимире, приимыи венець от Вседьржителя Бога! Радуйся, святая главо, вожю и учителю нашь, имьже избывъше от тьмы, свет познахом! Радуйся, честьное древо самого рая, иже въздрасти нам святей леторасли святою мученику Бориса и Глеба, от нею же ныне сынове русьстии насыщаються, приемлюще недугом исцеление! Радуйся, делателю веры Христовы, растьрзав лестьное тьрние и раздрушив, възорав крещениемь всю землю и насеяв святыми книгами, от них же жнють русьстии сынове полезныя рукояти покаянию и друзии уже ядять нескудную пищю в царствии небеснемь, ея же тряпезы сподобимъся и мы, недостоинии, кающеся о съгрешениих своих.

Распространенная редакция Проложного жития князя Владимира издавалась лишь один раз по единственному известному тогда списку Торжественника XV в. Румянцевского собрания, № 435 (Соболевский А.И. Памятники древнерусской литературы, посвященные Владимиру св. // Чтения в Историческом обществе Нестора Летописца. Кн. 2. Киев, 1888. С. 30–32). Ниже публикуется еще один, ранее неизвестный список этого произведения, находящийся в Соборнике XVI в.: РГБ. Ф.113 (Иос.-Вол.). № 652. Л. 422 об. — 425 об. Он имеет важные отличия по сравнению со списком, изданным Соболевским, и в ряде случаев дает более исправный текст. В этом списке также отсутствуют рассказ об освящении и украшении Десятинной церкви и молитва князя Владимира по завершении строительства храма (извлеченные, вероятно, из летописи), что сближает данный текст с его основным источником — обычным Проложным житием князя Владимира. Житие читается в рукописи под 15 июля, днем памяти святого князя.

В той же день успение благовернаго велика! о князя Владимера, нареченнаго в святем крещение Василья.

Сии Володимер князь, сын Святославль, от племени варяжьска, преже убо во идолы верова, по очию преданию. Егда же въсхоте Бог люди многи к себе привести, и вдохну в него Бог благодать Святаго Духа. Он же возбнув, яко от сна, от лютаго идолослужения, и посла во // (л. 423) вся языкы испытати закона, како верують, и уведа святую веру греческую, яко свещу на светиле, и рече: «Сице сътворю, пойду в землю их и пленю град их, и обрящю тамо учителя». Да еже умыслить, ‘то како творю’[148]. И шед, взя Корсунь, князя и княгиню убии, а дщерь ею дасть за Жберну. И не распусти полков, но посла Ольга, воеводу своего, с Жьберном в Царьград ко царема, прошает за ся сестры их. Царие же реша ему: «Аще крестишися, то не се едино получиши, но и царьство приимеши, с нами единоверник будеши». Он же рече: «Аще дасть за мя сестру свою, то и аз крещюся. Аще ли не даете, то створю граду вашему, яко и сему створих». Они же убояшася страхом, по//(л. 423 об.)имше потриарха и сестру свою, и вшедше в церковь Святыя Богородица, и поклонишася, глаголющи сице: «Госпожа Святая Богородица, яко тобою познахом истиннаго Бога, воплощашагося и рожьшагося ис тебе, не дай же, Госпоже, осквернити рабы своя поганому сему, но приведи его во крещение, да и ти познають Сына Бога твоего». И се рекши, отпустиша ю с кресты, и с епископы, и с попы, и с крилосом, и проводиша в Корсунь. В то же время Владимер очима боляше. И посла к нему царица, глаголющи: «Царю Владимере! Аще не крестишься, то не избудеши болезни сея». Он же рече: «Крестите мя, ибо на то вы есмы призвал». Егда же крестишася, и створи чюдо велие: вшедшю же ему в святую купель, отверзошася ему очи, и бысть яко нико(л. 424)лиже не болел. И похвали всех Бога, и просвещен бысть, радовашеся душею и телом. И пришед в Киев, и изби вся идолы: и Перуна, Хърса, Дажьбога, Мокошь и прочая вся идолы. Посем заповеда всем людем крестися и рече им: «Аще кто не обрящется утре на реце, той будеть мне противник». И заутра приидоша на Почаину реку вси мужи и жены и дети, свершении же в воде стояху, овии до пояса, а друзии до выя, а инии бродяху, а прозвитери по брегу стояща молитвы глаголаху, и та крестиша множество людии. Оттоле нарече святое место, идеже есть церкви Петрова. Сии же блаженный Владимер первый бысть наставник нашему спасению. Въздев руце на небо и помолися Богу за вся люди своя, глаголя: «Господи, Царю небесный, и призри, Господи, на // (л. 424 об.) новокрещение люди сия и дай же им, Господи, увидети Тебе, истиннаго Бога, утверди в них правоверную сию веру, и мне помози, Господи, на противныя врагы, да надеюся на Твою силу и помощь и попру вся козни их». Повеле же людем ставити церкви по всем градом и селом, а сам созда церковь Святую Богородицю Десятинную. Пожив же лет 28 и преставися к Богу месяца июля 15 день, и положиша тела его в церкви Святыя Богородица, юже сам созда. И плакася его множество бояр и людии: бояре аки оца, людие аки заступника, сироты и вдовици аки помощника и кормителя. Да како тя можем по достоянию похвалити, сътворшаго равно апостолом! Хвалити убо Римъская[149] земля Петра и Павла, а Асииская Ивана Богослова, а Его//(л. 425) упетьская Марка, а Онтиохииская Луку, а Греческая Андрея, вся же земля Руская тобе, Владимере, я[ко][150] Божия апостола, молебными песньми память твою празнующе. Похвалнью венца принесем ти, глаголюще: Радуйся, Владимере, приими венець от Вседержителя Бога! Радуйся, святая глава, вожю и учителю нашь, тобою бо мы избывше тмы и свет познахом! Радуйся, красное древо святаго рая, [и]же[151] възрасти нам честней леторасли святую мученику Бориса и Глеба, от нею же ныне рустии сынове насыщаются, приемлюще недугом исцеление. Радуйся, делателю веры Христовы, растерзав лестъное терние, взорав крещением всю землю и насеяв книгами, от них же жнугь рустии сынове полезныя рукояти покоянию, // (л. 425 об.) а друзии ядять неоскудную пищю в царствии небесном, ея же трапезы сподобимся и мы, недостоини, кающеся грехов своих. Ему же слава.