110.
О ВОЗВРАЩЕНИИ НА ПЕРВОЕ ПАКИ
Царственное бытие богоспасаемаго града Киева.
БОГОСПАСАЕМЫЙ ПРЕСЛАВНЫЙ и первоначальный всея России Царственный град Киев, по многих пременах своих, изрядною милостию Божиею аки на первое бытие возвращаяйся, от древняго достояния Царскаго паки в достояние Царское прииде, егда Царь Царем и Господь Господем паче прочих Царей земных возносяй рог Христа своего, Великаго Государя нашего Царя и Великаго Князя Алексея Михайловича, всея Великия и Малыя и Белыя России Самодержца, и многих Государств и Земель восточных и западных и северных отчича и дедича и наследника и Государя и Обладателя, его Царскаго пресветлаго Величества искони вечную скиптроносных прародителей его отчину, Царственный той град Киев в его скиптроносныи Царскии руце, яко природное Царское его присвоение, возврати и с пребогатыми сокровищи, Церквами святыми и Обительми, изряднее же с пресвятыя, чистыя, преблагословенныя, преславныя владичицы нашея Богородицы и приснодевы Марии Великою чудотворною Лаврою Печерскою Киевскою, и с Преподобных Отец Печерских нетленными, многочудесными и многоцелебными мощами вручи, лета от создания Мира 7162, от Рождества же Христа Спасителя нашего 1654, месяца Марта дня 1. Бысть же тогда литера азбуки пасхальныя Д, аки некое доброе знамение, жизнь добру и всякаго добра благую надежду всем под великодержавною его государскою рукою сущим, наипаче Богоспасаемому Царственному граду Киеву изобразующее в предъидущие годы. Что же добрейше и что доброполучнейше того, егда он же блаженныя памяти великий Государь наш Царь и Великий Князь Алексей Михайловичь всея Великия и Малыя и Белыя России Самодержец и пременяя добровременное свое Царствие земное на добрейшее вечное Небесное, не остави нас сирых! Аще бо и умре, но яко не умре; подобна ба себе остави по себе в лето от создания Мира 7184, от Рождества Христова 1676, месяца Генваря в тридцатое число (добрую отрасль свою от добраго корене во благочестии первоначальнаго Царя Киевскаго и всея России Самодержца Святаго Равноапостольнаго Князя Владимира, от крове же и от чресл своих Царских добре израстшую) Великаго Государя нашего Царя и Великаго Князя Феодора Алексеевича, всея Великия и Малыя и Белыя России Самодержца и многих Государств и земель восточных и западных и северных отчича и дедича и наследника, и Государя и обладателя, его Царское пресветлое Величество, в животе своем видев и возвеселися, и на умертвии своем не оскорбися, врагом остави местника и другом воздающа благодать.
Он же бо Великий Государь наш, его Царское пресветлое Величество, Богом избранный, Богом почтенный, Богом превознесенный и елеем святым чрез богомольца и в Дусе Святом Отца своего, Великаго Господина, Святейшаго Иоакима Патриарха Московскаго и всея России, в Святой Соборной Церкве успения пресвятыя Богородицы, в Богоспасаемом Царственном граде Москве помазанный в лето вышереченное от создания Мира и от Рождества Христова, месяца Июля дня 18, милостию предобраго Бога, помощию Пресвятыя Богородицы, Святых и Преподобный заступников наших Российских и всех святых, но молитвами блаженныя памяти приснопамятных родителей своих Государских, абие на престоле Царствия своего преспевая возрастом, премудростию, силою, славою и доброполучным щастием, конечное на богоспасаемый Царственный град Киев поганых Агарян и нечестивых Измаильтян устремление разруши; Киев же добрыя выше чаяния надежды исполни и весь православнороссийский народ веселием и желаемою отрадою прохлади сицевым действием.
111.
О ПЕРВОМ БЕСУРМАНСКОМ
приходе под Чигирин.
В ЛЕТО ОТ СОЗДАНИЯ МИРА 7186, от Рождества же Христова 1677, поущением ненавистника роду Христианскаго, лжи отца внук, Турский Солтан, устремився на православнороссийский край, наипаче на богоспасаемый Царственный град Киев, хотя его под свою бесурманскую власть подбити, посла многии свои силы Турецкии и Татарскии с Имбраим Башею и с Ханом Крымским прежде под славный старинный город Козацкий начальнейший Чигирин, приказавши Чигирина добывати, а добывши, абие ити под Киев. Но Господь, разоряяй советы язык и противляяйся гордым, разсточи гордыя мысли сердца их. Аще бо и много седмиц Чигирина всеми силами, всякими воинскими промыслы, безпрестанными приступами, подкопами, гранатами, безчисленною стрельбою день и нощь доставаху и время от времени конца злому намерению своему чаяху, но не возмогоша совершенно успети. Из града бо Чигирина крепко ратныи Царскаго пресветлаго Величества и Козаки боронишася, и поганых многии тысящи побиша, в осаде сидяще. Егда же егож Царскаго пресветлаго Величества многочисленныя силы с Боярином Князем Григорием Григориевичем Ромодановским, и многии полки Козацкии с Гетманом войска его Царскаго пресветлаго Величества Запорожскаго, Иоанном Самойловичем, к Днепру на отсечь, или на освобождение Чигирина приидоша, погании Агаряне услышавши о великих силах Государевых, аще и убояшеся, обаче боязнь ту сокрывающе в сердце, прилежнее к Чигирину приступаху, ни на мало время ослабы осадником Чигиринским дающе; Августа же наипаче числа 27 всеми силами добываху города Чигирина, всячески уже достати его нудящеся, дондеже бы не приспела отсечь Государская к Чигирину.
А в богоспасаемом Царственном граде Киеве тогожде месяца августа, на память Преподобнаго отца нашего Пимина Великаго бысть обхождение окрест всего великаго верхняго города Киева с Кресты, с чудотворною Иконою Пресвятыя Богородицы КиевоПечерскою, (яже никогда по то время не бяше от Церкве Пресвятыя Богородицы из Обители Печерския движима) с честным Крестом, в нем же бе часть животворящаго древа Креста Господня и мощи многих Святых Угодников Божиих, и спрочиими святыми Чудотворными Иконами, при его Царскаго пресветлаго Величества Боярине и Воеводе Киевском, Князе Иоанне Борисовиче Троекурове и при Окольничем Иоанне Ивановиче Ржевском. Такожде в трудех бяше и сам Всечестный Господин отец Иннокентий Гизель, Архимандрит Святыя КиевоПечерския Обители, с прочими честными Игуменами святых Монастырей Киевских, и иных множество многое духовнаго и мирскаго чину людей; все еле не чрез весь день летний труждахуся, за чудотворною Иконою Пресвятыя Богородицы ходяще, и в умилении и сокрушении сердца молебное пение и молитвы к Спасителю Богу и к спасающей от бед Пресвятой Богородице приносяще; и толиким новым подвижением чудотворныя КиевоПечерския Иконы пресвятыя Богородицы изрядно чудо и всемирная радость соделася. В тойже бо день под Чигирином возбранныя Воеводы и заступницы Христианом непостыдныя заступлением внезапу нападе на горделивыя поганы страх и трепет велий, и абие превратишася в бегство полки чужды с великим и никогда еще не бывшим толиким посрамлением и зельною пагубою сил Бесурманских, иже невидимою силою Божиею гоними быша сице, яко безпрестанным бегством во дни и в нощи истомльшеся, множество их велие везде по пути погибе, едва прочии от превелика страха Божия в своя си угонзнуша; град же Чигирин свобожден бысть от всяких бед, и запятая сеть суеумнаго намерения Агарянскаго на богоспасаемый Царственный град Киев аки паучина сокрушися; а мы все помощию Господа, сотворшаго Небо и землю, по заступлению Пресвятыя Богородицы, ходатайством Святых Российских чудотворцов, Преподобных Отец наших Антониа и Феодосиа и прочих КиевоПечерских, и всех Святых молитвами, изрядным щастием Великаго Государя нашего Царя и Великаго Князя Феодора Алексеевича всея Великия и Малыя и Белыя России Самодержца под его высокою Государскою рукою добре избавлены быхом.