68.

О СЕМ, ЯКО НЕ БЛАГОСЛОВИ

Самодержцу Российскому Роману Владимирский Епископ Греческа закона воеватися со Христианами, кроме благословныя вины.

ЛЕТА ОТ РОЖДЕСТВА ХРИСТОВА 1205, Великий Князь Роман, пристяжавши себе Самодержавствие Российское, посла с дарами к Епископу Владимирскому, прося благословения на зачатие войны противу Короля Польскаго Лешка. Но Епископ он отрече, и не благослови ему на сие дело глаголя: яко не подобает благословляти Христианом на Христиан войну подносити, кроме благословныя вины. Посем Великий Князь и Самодержец Роман живот смертию премени военною, и погребен бысть во Владимире Волынском честно.

69.

СПОР О СТОЛИЦЕ

Самодержавия Российскаго и изгнании Князя от Венгров, или от Угров.

ПО СМЕРТИ ВСЕЯ РОССИИ самодержца Романа велие между собою нестроение и спор Князие Российскии о Престоле Самодержавия имеяху; иныи хотеша в преславном граде Киеве Престол имети, иныи в Галиче и Владимире; и не возмогше с собою любезно смиритися, избраша себе от Венгерския, или Угорския Земли Королевича Коломана, егоже Епископы на Российское Царство помазаша и венец Царский Винцент Кадлубок, Бискуп Краковский, возложи нань, и бысть Коломан всея России Самодержец. Но егда Коломан поят себе в жену сестру Лешка Белого именем Соломку, возгнегодоваша православноРоссийскии Князие, да не пременена будет православная Вера, абие избраша Мстислава Мстиславича Великоновгородского в Самодержца Российскаго, иже изгна Коломана, а сам на Престоле Царстем седе в Галиче, и венчан бысть от Епископов венцем Царским, егоже отбеже Коломан, и оглашен бе Царь и всея России Самодержец. Сей Мстислав Мстиславичь бяше зело храбр, Венгерскую, или Угорскую и Польскую силу порази и име Коломана с женою его во узах. По сем Великий Самодержец Российский Мстислав Храбрый преставися в Торску, и погребоша его в Киеве в Церкви честнаго Креста Господня, юже созда, лета от рождества Христова 1212. По смерти его паки Коломан Венгерский объят Престол в Галиче, но едва три лет пребысть на нем и умре лета от рождества Христова 1215, и от того времени Венгерскии Короли господствовати в России престаша. По Коломановой смерти седе на Престоле Царстем в Галиче Князь Данило Романовичь: но Изяслав собравши войско от Половцов, изгна Данила, а Галичь поступи Князю Михалку Свеногородскому. Ведомо же буди о сем, яко Галицкое Княжение, или царствие того ради зде предложися, яко и Киевское Самодержавствие пренесено бысть к нему, и оттуду не тако знамениты Князие Киевстии бяху. А отселе паки изряднее Князие Киевскии, от них же наипаче слово изъясняется, от Ростислава Рюриковича даже до нашествия злачестиваго Батыя.

70.

О КНЯЗЕХ РАЗНЫХ

Киевских.

РЮРИК РОСТИСЛАВИЧ по смерти Романа, Великаго Князя Галицкаго и всея России, писавшагося Самодержца, от негоже по нужде пострижен бысть в черноризца, оставльши иночество, паки седе в Киеве на Престоле Княжения. Не сущу же ему в некое время в Киеве, восхити Престол его Всеволод Ольговичь Чермный, Князь Черниговский, и седе в Киеве. Обаче Рюрик собрався с силою, изгна Всеволода из Киева, а сам паки седе в нем на Престоле Княжения. Сия же между има многажды содевашася: но помиришася с собою, и пусти Рюрик Киев Всеволоду, а сам седе в Чернигове. По сем Великоновгородский Князь Мстислав Мстиславичь изгна Всеволода из Киева и посади в нем Мстислава Романовича, Князя Смоленскаго. Сего Князя Киевскаго Мстислава с прочиими Князи Российскими и с силою воинскою победиша Татаре, самаго же плениша, и другаго с ним Черниговскаго Князя: но Владимир Рюриковичь ушедши от тоя победы в Киев, сяде в нем на Престоле княжения; обаче по некиих временех и Владимир Рюриковичь от Половцов побежден и пленен бысть; а по нем седе в Киеве на княжении Изяслав Мстиславичь. На сего по летех неких воста Ярослав Всеволодовичь, и прииде к Киеву и изгна Изяслава, а сам в нем седе на княжении. Изшедши же Владимир Рюриковичь от пленения Половцов, изгна Ярослава из Киева, а сам паки седе в нем на Княжении: но не по долзе Владимира изгна из Киева Михаил Всеволодовичь, Князь Черниговский, и седе сам в нем на Княжении.

71.

О КНЯЖЕНИИ МИХАИЛА

Всеволодовича в Киеве, и о нашествии злочестиваго Батыя.

ЛЕТА ОТ СОЗДАНИЯ МИРА 6748, от рождества Христова 1240, княжащу в Киеве Михаилу Всеволодовичу, присла злочестивый Батый Татаров своих соглядати Киева, и видевше величество и красоту его, удивишася, и возвращшеся поведаша Батыеви о преславном граде Киеве. Паки же Батый посла к Князю Михаилу прельщая его, да поклонится ему. Михаил же Князь поби послов Батыевых, а сам побеже из Киева в Угры. Тогда Ростиславичь, внук Давида Смоленскаго, услышавши, яко несть Князя в Киеве, прииде и седе в нем на княжении, егоже Данило Мстиславичь, внук Мстислава сына Изяславова, изгна из Киева и посади в нем Воеводу своего именем Димитра, и заповеда ему да хранит града и всячески бранит. Прииде же проклятый Батый с силою многою под Киев и обступи его, и нача пороки (машины) ставити и бити в стены градския. Людие же из града крепко бранишеся, а потом окрест Десятинныя Церкве Пресвятыя Богородицы окопашася, и на палаты Церковныя много людей возбегоша, яко от тяжести их палаты обвалишася и многих побиша: а Татаре всея России Стольный и по всей подсолнечной славный Царственный град Киев взяша, Церкви божественныя разориша, город и место огнем сожегоша, людей иных посекоша, а иных плениша, и все Государство Киевское ни во что обратиша, и Богу тако грех ради человеческих попустившу.

72.

О РАЗОРЕНИИ ПРЕКРАСНЫЯ

Святыя Великия чудотворныя Лавры Печерския Киевския.

ТОГОЖ ЛЕТА ЗЛОЧЕСТИВЫЙ Батый разоривши преславный град Киев, прииде с погаными своими и к Святой Обители Печерской, идеже множество народа бе в затворе, и мужественно противу того врага Креста Господня места ради святаго стояше: но грех ради не возмогоша Христиане отбитися и уцелити. Ибо нечестивии варвары овнами, или таранами стены каменныя Монастырския столкши и до основания сокрушивши, в Святую Обитель внидоша, людей всякаго чина посекоша, иных плениша, и самую Небеси подобную Церковь Пресвятыя Богородицы Печескую оскверниша, от всего украшения обнажиша и Крест с главы Церковныя златокованый сняша, а верх до полуцеркве по окна повелением проклятаго Батыя испровергоша; такожде и верх олтаря великаго по перси иконы пресвятыя Богородицы избиша, и весь Монастырь со всеми украшениями и каменными стенами до основания искорениша и разметаша, яко о том подробну в древних Летописех Руских обретается; и от того времени преукрашенныя Божиею славою Девы обитель Святая Печерская до своего перваго бытия и красоты древния не возможе приити. Ибо нынешнее строение далече разно есть от перваго. Любящих же благолепие храма Богоматере иных смерть своею посече косою, иных нашествия иноплеменник мечь пояде, иным междоусобныя брани нестроение препятие содела: а ныне изрядным промышлением о всем православнороссийском народе, блаженныя памяти благочестивейшаго Государя нашего Царя и Великаго Князя Алексея Михайловича, всея Великия и Малыя и Белыя России Самодержца, и по нем наследника его Государева, Великаго Государя нашего Царя и Великаго Князя Феодора Алексеевича, всея Великия и Малыя и Белыя России Самодержца, благополучно царствующаго, красуется и всякия исполнена есть надежды.