23 или всяким каменем, имже вержет не ведый, и падет на него, и умрет, он же враг его не бе, ниже ищяй зла ему творити,
24 и да судит сонм между убившим и между ужиком крове, по судбам сим,
25 и избавит сонм убившаго от ужика крове, и да возвратит его сонм во град убежища его, в оньже убежа, и да поживет тамо, дондеже умрет жрец великий, егоже помазаша елеем святым.
26 Аще же исходом изыдет убивый вне предел града, в оньже убежа тамо,
27 и обрящет его ужик крове вне предел града убежища его, и убиет ужик крове убившаго, несть повинен:
28 во граде бо убежания да живет, дондеже умрет жрец великий, и по умертвии жерца великаго да возвратится убивый в землю одержания своего.
29 И да будут сия вам во оправдание суда в роды вашя во всех селениих ваших.
30 Всякаго убившаго душу, пред свидетелми да убиеши убившаго: и свидетель един да не свидетелствует на смерть души.
31 И да не возмете искупа за душу от убившаго, повинна суща убиению: смертию бо умрет:
32 ниже да возмете искупа убежания во град убежища, да паки живет на земли, дондеже умрет жрец великий.
33 И да не убиете земли, на нейже вы обитаете: кровь бо сия убивает землю, и не очистится земля от крове пролиянныя на ней, но токмо кровию проливающаго:
34 и да не оскверните земли, на нейже живете, на нейже аз вселяюся посреде вас: аз бо есмь Господь вселяяйся посреде сынов израилевых.
Глава 36
1 И приидоша князи племене сынов галаадовых, сына махирова сына манассиина от племене сынов иосифовых, и глаголаша пред моисеом и пред елеазаром жерцем и пред князи домов отечеств сынов израилевых,
2 и рекоша: господину нашему повеле Господь отдати землю наследия по жребию сыном израилевым: и господину нашему заповеда Господь дати наследие салпаада брата нашего дщерем его:
3 и будут единому от племен сынов израилевых в жены, и отлучится жребий их от одержания отец наших, и приложится к наследию племене, имже будут в жены, и от жребия наследия нашего отлучится:
4 аще же будет оставление сынов израилевых, и приложится наследие их к наследию племене, имже аще будут в жены, и от наследия племене отечества нашего отимется наследие их.
5 И заповеда моисей сыном израилевым по повелению Господню, глаголя: сице племя сынов иосифовых глаголют:
6 сие слово, еже заповеда Господь дщерем салпаадовым, глаголя: идеже угодно им, да будут в жены, токмо от сонма отечества своего да будут в жены,
7 и не превратится наследие сынов израилевых от племене в племя ино: яко кийждо в наследии племене отечества своего женитися имут сынове израилевы:
8 и всяка дщи, ужичествующая наследие от племен сынов израилевых, единому сущих от сонма отца ея да будет жена: да ужичествуют сынове израилевы кийждо наследие отца своего:
9 и не превратится жребий от племене в племя ино, но кийждо в наследии своем да женятся сынове израилевы.
10 Якоже повеле Господь моисею, тако сотвориша дщери салпаадовы.
11 И быша маала и ферса, и егла и мелха и нуа, дщери салпаадовы, сыном братии своея, от сонма манассиина сынов иосифовых, быша в жены:
12 и бысть наследие их в племени сонма отца их.
13 Сия заповеди и оправдания и суды, яже заповеда Господь рукою моисеовою на западе моавли при иордане прямо иерихону.
Пятая книга Моисеева. Второзаконие
Глава 1
1 Сия словеса, яже глагола моисей всему израилю об ону страну иордана, в пустыни на запады, близ чермнаго моря, между фараном и тофолом, и ловоном и авлоном и златыми рудами:
2 единонадесяти дний от хорива путь чрез гору сиир даже до кадис-варни.
3 И бысть в четыредесятое лето, в первыйнадесять месяц, в первый день месяца глагола моисей ко всем сыном израилевым, по всему елико заповеда ему Господь к ним,
4 по убиении сиона царя аморрейска, жившаго во есевоне, и ога царя васанска, жившаго во астарофе и во едраине,
5 об ону страну иордана в земли моавли, нача моисей изясняти закон сей, глаголя:
6 Господь Бог наш глагола нам в хориве, глаголя: да довлеет вам жити в горе сей:
7 обратитеся и воздвигнитеся вы, и внидите в гору аморрейску, и ко всем населником аравы, в гору и поле, и к югу и в приморскую землю ханааню, и во антиливан, даже до реки великия, реки евфрата:
8 видите, предах пред вами землю, вшедше наследите землю, еюже клятся Господь отцем вашым, аврааму и исааку и иакову, дати ю им и семени их по них.
9 И рекох к вам во время оно глаголя: не возмогу един водити вас:
10 Господь Бог ваш умножил вы есть, и се, есте днесь яко звезды небесныя множеством:
11 Господь Бог отец ваших да приложит вам, яко да будете тысящами сугубо, и да благословит вас, яко же глагола вам:
12 како возмогу един носити труды вашя и тяжести вашя и пререкания ваша?
13 изберите себе мужы мудры и уметелны и смысленны в племенех ваших, и поставлю их над вами старейшины вам.
14 И отвещасте ми и рекосте: добро слово, еже глаголал еси сотворити.
15 И взях от вас мужы мудры и уметелны и смысленны, и поставих их владети над вами тысященачалники и стоначалники, и пятьдесятоначалники и десятоначалники, и писмовводители судиям вашым.
16 И заповедах судиям вашым во время оно, глаголя: разслушайте посреде братий ваших, и судите праведно посреде мужа и посреде брата его и посреде пришелца его:
17 да не познаете лица в суде, малому и великому судиши, и не устыдишися лица человеча, яко суд Божий есть: и речь, яже аще жестока будет у вас, донесете ю ко мне, и услышу ю.
18 И заповедах вам во время оно вся словеса, яже сотворите.
19 И воздвигшеся от хорива, проидохом всю пустыню великую и страшную ону, юже видесте, путь горы аморрейски, якоже заповеда нам Господь Бог наш: и приидохом до кадис-варни.
20 И рекох вам: приидосте до горы аморрейски, юже Господь Бог наш дает вам:
21 видите, предаде Господь Бог ваш пред лицем вашим землю: вшедше наследите, якоже глагола Господь Бог отец ваших вам: небойтеся, ни ужасайтеся.
22 И приидосте ко мне вси и рекосте: да послем мужы пред нами, и да соглядают нам землю, и да поведят нам ответ, путь, имже дойдем ея, и грады, в няже внидем.
23 И угодно бысть слово предо мною, и поях от вас дванадесять мужей, мужа единаго от коегождо племене.
24 И обратившеся взыдоша на гору, и приидоша до дебри грезновныя, и соглядаша ю:
25 и взяша в руце свои от плода земли и принесоша к нам, и глаголаху: блага земля, юже Господь Бог наш дает нам.
26 И не восхотесте взыти, но преслушасте глаголгол Господа Бога вашего:
27 и возроптасте в кущах своих и рекосте: ненависти ради изведе ны Господь из земли египетския предати нас в руки аморрейския, потребити нас:
28 камо мы взыдем? Братия же вашя отвратиша сердца ваша, глаголюще: язык велик и мног и крепчае нас, и грады велицы и ограждени даже до небесе, но и сыны исполинов видехом тамо.
29 И глаголах к вам: не ужасайтеся, ниже убойтеся от них:
30 Господь Бог ваш предходяй пред лицем вашим, той повоюет их с вами, по всему елико сотвори вам в земли египетстей пред очима вашима,
31 и в пустыни сей, юже видесте: яко воспита тебе Господь Бог твой, якоже некий человек питает сына своего, по всему пути в оньже ходисте, дондеже приидосте на место сие.
32 И в словеси сем не веровасте Господеви Богу вашему,
33 иже предходит пред вами в путь избрати вам место, путеводя вас огнем нощию, показуя вам путь, имже ити по нем, и облаком во дни.
34 И услыша Господь (Бог) глас словес ваших, и разгневався клятся, глаголя:
35 аще узрит кто от мужей сих землю благую сию, еюже аз кляхся отцем их,
36 разве халев сын иефонниин, сей узрит ю, и сему дам землю, на нюже взыде, и сыном его, понеже прилежит Господеви.
37 И на мя разгневася Господь вас ради, глаголя: ниже ты внидеши тамо:
38 иисус сын навин, иже стоит пред тобою, сей внидет тамо: сего укрепи, яко сей даст ю в наследие израилю: