2 И отвещав Иисус рече ему: видиши ли сия великая здания? не имать остати зде камень на камени, иже не разорится.

3 И седящу ему на горе елеонстей прямо церкве, вопрошаху его единаго петр и иаков, и иоанн и андрей:

4 рцы нам, когда сия будут? и кое (будет) знамение, егда имут вся сия скончатися?

5 Иисус же отвещав им, начат глаголати: блюдитеся, да не кто вас прельстит.

6 Мнози бо приидут во имя мое, глаголюще, яко аз есмь: и многи прельстят.

7 Егда же услышите брани и слышания бранем, не ужасайтеся: подобает бо быти: но не у кончина.

8 Востанет бо язык на язык, и царство на царство: и будут труси по местом, и будут глади и мятежи. Начало болезнем сия.

9 Блюдитеся же вы сами: предадят бо вы в сонмища, и на соборищих биени будете: и пред воеводы и цари ведени будете мене ради, во свидетелство им.

10 И во всех языцех подобает прежде проповедатися Евангелию.

11 Егда же поведут вы предающе, не прежде пецытеся, что возглаголете, ни поучайтеся: но еже аще дастся вам в той час, се глаголите: не вы бо будете глаголющии, но Дух святый.

12 Предаст же брат брата на смерть, и отец чадо: и востанут чада на родители и убиют их.

13 И будете ненавидими всеми имене моего ради: претерпевый же до конца, той спасен будет.

14 Егда же узрите мерзость запустения, реченную даниилом пророком, стоящу, идеже не подобает: чтый да разумеет: тогда сущии во иудеи да бежат на горы:

15 и иже на крове, да не слазит в дом, ни да внидет взяти чесо от дому своего:

16 и иже на селе сый, да не возвратится вспять взяти ризу свою.

17 Горе же непраздным и доящым в тыя дни.

18 Молитеся же, да не будет бегство ваше в зиме.

19 Будут бо дние тии скорбь, якова не бысть такова от начала создания, еже созда Бог, доныне, и не будет.

20 И аще не бы Господь прекратил дний, не бы убо спаслася всяка плоть: но избранных ради, ихже избра, прекратит дни.

21 Тогда аще кто речет вам: се, зде Христос, или: се, онде: не имите веры.

22 Востанут бо лжехристи и лжепророцы и дадят знамения и чудеса, еже прельстити, аще возможно, и избранныя.

23 Вы же блюдитеся: се, прежде рех вам вся.

24 Но в тыя дни, по скорби той, солнце померкнет, и луна не даст света своего,

25 и звезды будут с небесе спадающя, и силы, яже на небесех, подвижутся.

26 И тогда узрят Сына Человеческаго грядуща на облацех с силою и славою многою.

27 И тогда послет ангелы своя и соберет избранныя своя от четырех ветр, от конца земли до конца неба.

28 От смоковницы же научитеся притчи: егда уже ветвие ея будет младо и изращает листвие, ведите, яко близ есть жатва:

29 тако и вы, егда сия видите бывающа, ведите, яко близ есть, при дверех.

30 Аминь глаголю вам, яко не имать прейти род сей, дондеже вся сия будут.

31 Небо и земля прейдут, словеса же моя не прейдут.

32 О дни же том или о часе никтоже весть, ни ангели, иже суть на небесех, ни Сын, токмо Отец.

33 Блюдите, бдите и молитеся: не весте бо, когда время будет.

34 Якоже человек отходя оставль дом свой, и дав рабом своим власть, и комуждо дело свое, и вратарю повеле, да бдит.

35 Бдите убо: не весте бо, когда господь дому приидет, вечер, или полунощи, или в петлоглашение, или утро:

36 да не пришед внезапу, обрящет вы спящя.

37 А яже вам глаголю, всем глаголю: бдите.

Глава 14

1 Бе же пасха и опресноцы по двою днию: и искаху архиерее и книжницы, како его лестию емше убиют:

2 глаголаху же: (но) не в праздник, еда како молва будет людска.

3 И сущу ему в вифании, в дому симона прокаженнаго, возлежащу ему, прииде жена, имущи алавастр мира нарднаго пистикиа многоценна: и сокрушши алавастр, возливаше ему на главу.

4 Бяху же нецыи негодующе в себе и глаголюще: почто гибель сия мирная бысть?

5 можаше бо сие продано быти вящше триех сот пенязь и датися нищым. И прещаху ей.

6 Иисус же рече: оставите ю: что ей труды даете? добро дело содела о мне.

7 Всегда бо нищыя имате с собою, и егда хощете, можете им добро творити: мене же не всегда имате.

8 Еже име сия, сотвори: предвари помазати мое тело на погребение.

9 Аминь глаголю вам: идеже аще проповестся Евангелие сие во всем мире, и еже сотвори сия, глаголано будет в память ея.

10 И иуда искариотский, един от обоюнадесяте, иде ко архиереем, да предаст его им.

11 Они же слышавше возрадовашася и обещаша ему сребреники дати. И искаше, како его в удобно время предаст.

12 И в первый день опреснок, егда пасху жряху, глаголаша ему ученицы его: где хощеши, шедше уготоваем, да яси пасху?

13 И посла два от ученик своих и глагола има: идита во град: и срящет вас человек в скудельнице воду нося: по нем идита,

14 и идеже аще внидет, рцыта господину дому, яко учитель глаголет: где есть виталница, идеже пасху со ученики моими снем?

15 и той вама покажет горницу велию, постлану, готову: ту уготовайта нам.

16 И изыдоста ученика его, и приидоста во град, и обретоста, якоже рече има: и уготоваста пасху.

17 И вечеру бывшу прииде со обеманадесяте.

18 И возлежащым им и ядущым, рече Иисус: аминь глаголю вам, яко един от вас предаст мя, ядый со мною.

19 Они же начаша скорбети и глаголати ему един по единому: еда аз? И другий: еда аз?

20 Он же отвещав рече им: един от обоюнадесяте, омочивый со мною в солило.

21 Сын убо Человеческий идет, якоже есть писано о нем: горе же человеку тому, имже Сын Человеческий предастся: добрее было бы ему, аще не бы родился человек той.

22 И ядущым им, приемь Иисус хлеб, (и) благословив, преломи и даде им, и рече: приимите, ядите: сие есть тело мое.

23 И приим чашу, хвалу воздав, даде им: и пиша от нея вси.

24 И рече им: сия есть кровь моя новаго завета, за многи изливаема:

25 аминь глаголю вам, яко ктому не имам пити от плода лознаго до дне того, егда е пию ново во Царствии Божии.

26 И воспевше изыдоша в гору елеонскую.

27 И глагола им Иисус, яко вси соблазнитеся о мне в нощь сию: писано бо есть: поражу пастыря, и разыдутся овцы.

28 Но потом, егда воскресну, варяю вы в галилеи.

29 Петр же рече ему: аще и вси соблазнятся, но не аз.

30 И глагола ему Иисус: аминь глаголю тебе, яко ты днесь в нощь сию, прежде даже вторицею петель не возгласит, трикраты отвержешися мене.

31 Он же множае глаголаше паче: аще (же) ми есть с тобою и умрети, не отвергуся тебе. Такожде и вси глаголаху.

32 И приидоша в весь, ейже имя гефсиманиа: и глагола учеником своим: седите зде, дондеже шед помолюся.

33 И поят петра и иакова и иоанна с собою: и начат ужасатися и тужити.

34 И глагола им: прискорбна есть душа моя до смерти: будите зде и бдите.

35 И прешед мало, паде на земли и моляшеся, да, аще возможно есть, мимо идет от него час:

36 и глаголаше: авва Отче, вся возможна тебе: мимо неси от мене чашу сию: но не еже аз хощу, но еже ты.

37 И прииде, и обрете их спящих, и глагола петрови: симоне, спиши ли? не возмогл еси единаго часа побдети?

38 бдите и молитеся, да не внидете в напасть: дух убо бодр, плоть же немощна.

39 И паки шед помолися, тожде слово рек.

40 И возвращься обрете я паки спящя: бяху бо очеса им тяготна: и не ведяху, что быша ему отвещали.

41 И прииде третицею и глагола им: спите прочее и почивайте: приспе конец, прииде час: се, предается Сын Человеческий в руки грешником:

42 востаните, идем: се, предаяй мя приближися.

43 И абие, еще ему глаголющу, прииде иуда, един сый от обоюнадесяте, и с ним народ мног со оружием и дрекольми, от архиерей и книжник и старец.

44 Даде же предаяй его знамение им, глаголя: егоже аще лобжу, той есть: имите его и ведите (его) сохранно.

45 И пришед, абие приступль к нему, глагола (ему): равви, равви. И облобыза его.

46 Они же возложиша руце свои на него и яша его.

47 Един же некто от стоящих извлек нож, удари раба архиереова и уреза ему ухо.