18 И обведе Бог люди путем, иже в пустыню к чермному морю. Пятаго же рода изыдоша сынове израилевы от земли египетския.

19 И взя моисей кости иосифовы с собою: клятвою бо закля иосиф сыны израилевы, глаголя: присещением присетит вас Господь, и изнесете отсюду кости моя с собою.

20 Воздвигшеся же сынове израилевы от сокхофа, ополчишася во офоме при пустыни.

21 Бог же вождаше их, в день убо столпом облачным, показати им путь, нощию же столпом огненным, светити им:

22 и не оскуде столп облачный во дни и столп огненный нощию пред всеми людьми.

Глава 14

1 И рече Господь к моисею глаголя:

2 рцы сыном израилевым, и обратившеся да ополчатся прямо придворию, между магдолом и между морем, прямо веельсепфону: пред ними ополчишися при мори:

3 и речет фараон людем своим о сынех израилевых: заблуждают сии по земли, затвори бо их пустыня:

4 аз же ожесточу сердце фараоново, и поженет созади их, и прославлюся в фараоне и во всем воинстве его: и уразумеют вси египтяне, яко аз есмь Господь. И сотвориша тако.

5 И возвещено бысть царю египетскому, яко бежаша людие, и превратися сердце фараоново и рабов его на люди, и рекоша: что сие сотворихом, отпустивше сыны израилевы, да не работают нам?

6 Впряже убо фараон колесницы своя, и вся люди своя собра с собою:

7 и поят шесть сот колесниц избранных, и вся кони египетския, и тристаты над всеми.

8 И ожесточи Господь сердце фараона царя египетскаго и рабов его, и погна созади сынов израилевых. Сынове же израилевы исхождаху рукою высокою.

9 И погнаша египтяне вслед их, и обретоша их ополчившихся при мори: и вся кони и колесницы фараоновы, и конницы, и воинство его прямо придворию, противу веельсепфона.

10 И фараон приближашеся. Воззревше же сынове израилевы очима, видеша: и се, египтяне ополчишася вслед их: и убояшася зело, и возопиша сынове израилевы ко Господу

11 и рекоша к моисею: за еже не быти гробом во египте, извел еси нас умертвити в пустыни: что сие сотворил еси нам, извед нас из египта?

12 не сей ли бяше глагол, егоже рекохом к тебе во египте, глаголюще: остави нас, да работаем египтяном: лучше бо бяше нам работати египтяном, нежели умрети в пустыни сей.

13 Рече же моисей к людем: дерзайте, стойте и зрите спасение еже от Господа, еже сотворит нам днесь: имже бо образом видесте египтян днесь, не приложите ктому видети их в вечное время:

14 Господь поборет по вас, вы же умолкните.

15 И рече Господь к моисею: что вопиеши ко мне? рцы сыном израилевым, и да путешествуют,

16 ты же возми жезл твой и простри руку твою на море, и расторгни е: и да внидут сынове израилевы посреде моря по суху:

17 и се, аз ожесточу сердце фараоново и всех египтян, и внидут вслед их: и прославлюся в фараоне и во всем воинстве его, и в колесницах и в конех его,

18 и уведят вси египтяне, яко аз есмь Господь, егда прославляюся в фараоне и в колесницах и в конех его.

19 Взятся же ангел Божий ходяй пред полком сынов израилевых и пойде созади их, взятся же и столп облачный от лица их и ста созади их.

20 И вниде посреде полка египетска и посреде полка сынов израилевых и ста: и бысть тма и мрак, и прииде нощь, и не смесишася друг с другом во всю нощь.

21 Простре же моисей руку на море, и возгна Господь море ветром южным сильным всю нощь, и сотвори море сушу, и разступися вода.

22 И внидоша сынове израилевы посреде моря по суху, и вода им стена бысть одесную и стена ошуюю.

23 Погнаша же египтяне и внидоша вслед их, и всяк конь фараонов, и колесницы, и всадники посреде моря.

24 Бысть же в стражу утреннюю, и воззре Господь на полк египетский в столпе огненнем и облачнем, и смяте полк египетский,

25 и связа оси колесниц их, и ведяше их с нуждею. И рекоша египтяне: бежим от лица израилева, Господь бо поборает по них на египтяны.

26 И рече Господь к моисею: простри руку твою на море, и да совокупится вода и да покрыет египтяны, колесницы же и всадники.

27 Простре же моисей руку на море, и устроися вода ко дню на место: египтяне же бежаша под водою, и истрясе Господь египтяны посреде моря:

28 и обратившися вода покры колесницы и всадники и всю силу фараонову, вшедши вслед их в море: и не оста от них ни един.

29 Сынове же израилевы проидоша по суху посреде моря: вода же им стена (бысть) одесную и стена ошуюю,

30 и избави Господь израиля в день он из руки египетския: и видеша сынове израилевы египтян измерших при краи моря.

31 Виде же израиль руку великую, яже сотвори Господь египтяном, и убояшася людие Господа и вероваша Богу и моисею угоднику его.

32 Тогда воспе моисей и сынове израилевы песнь сию Господви, и рекоша глаголюще:

Глава 15

1 Поим Господви, славно бо прославися: коня и всадника вверже в море:

2 помощник и покровитель бысть мне во спасение: сей мой Бог и прославлю его, Бог отца моего и вознесу его:

3 Господь сокрушаяй брани, Господь имя ему,

4 колесницы фараоновы и силу его вверже в море, избранныя всадники тристаты потопи в чермнем мори,

5 пучиною покры их, погрязоша во глубине яко камень:

6 десница твоя, Господи, прославися в крепости, десная твоя рука, Господи, сокруши враги:

7 и множеством славы твоея стерл еси сопротивных, послал еси гнев твой, пояде я яко стеблие,

8 и духом ярости твоея разступися вода: огустеша яко стена воды, огустеша и волны посреде моря:

9 рече враг: гнав постигну, разделю корысть, исполню душу мою, убию мечем моим, господствовати будет рука моя:

10 послал еси духа твоего, покры я море, погрязоша яко олово в воде зелней:

11 кто подобен тебе в бозех, Господи, кто подобен тебе? прославлен во святых, дивен в славе, творяй чудеса:

12 простерл еси десницу свою, пожре я земля,

13 наставил еси правдою твоею люди твоя сия, яже избавил еси, утешил еси крепостию твоею во обитель святую твою:

14 слышаша языцы и прогневашася, болезни прияша живущии в филистиме:

15 тогда потщашася владыцы едомстии и князи моавитстии, прият я трепет: растаяша вси живущии в ханаане:

16 да нападет на ня страх и трепет: величием мышцы твоея да окаменятся, дондеже пройдут людие твои, Господи, дондеже пройдут людие твои сии, яже стяжал еси:

17 введ насади я в гору достояния твоего, в готовое жилище твое, еже соделал еси, Господи, святыню, Господи, юже уготовасте руце твои:

18 Господь царствуяй веки, и на век, и еще:

19 егда вниде конница фараонова с колесницами и всадники в море, и наведе на них Господь воду морскую: сынове же израилевы проидоша сушею посреде моря.

20 Взя же мариам пророчица, сестра ааронова, тимпан в руце свои, и изыдоша вся жены вслед ея со тимпаны и лики:

21 преднача же им мариам, глаголющи: поим Господви, славно бо прославися: коня и всадника вверже в море.

22 Поят же моисей сыны израилевы от моря чермнаго и веде их в пустыню сур: и идяху три дни в пустыни, и не обретаху воды пити.

23 Приидоша же в мерру, и не можаху пити воды от мерры, горька бо бе: сего ради наречеся имя месту тому горесть.

24 И роптаху людие на моисеа, глаголюще: что пием?

25 Возопи же моисей ко Господу, и показа ему Господь древо, и вложи е в воду, и усладися вода: тамо положи ему оправдания и судбы, и тамо его искуси,

26 и рече: аще слухом услышиши глас Господа Бога твоего, и угодная пред ним сотвориши, и внушиши заповедем его, и сохраниши вся оправдания его: всяку болезнь, юже наведох египтяном, не наведу на тя: аз бо есмь Господь Бог твой исцеляяй тя.

27 И приидоша во елим, и бяху тамо дванадесять источников вод, и седмьдесят стеблий финиковых: и ополчишася тамо при водах.

Глава 16

1 Воздвигошася же от елима, и прииде весь сонм сынов израилевых в пустыню син, яже есть между елимом и между синою. В пятый же надесять день втораго месяца изшедшым им от земли египетския,