8 Тако глаголет Господь: имже образом обретается ягода на грезне, и рекут: не погуби его, яко благословение есть в нем: тако сотворю служащаго ми ради, не имам всех погубити ради его:

9 и изведу из иакова семя и из иуды, и наследит гору святую мою, и наследят избраннии мои и раби мои и вселятся тамо.

10 И будут во дубраве ограды стадом, и юдоль ахорская в покоище говядов людем моим, иже взыскаша мене.

11 Вы же, оставившии мя и забывающии гору святую мою, и уготовлящии демону трапезу и исполняющии щастию растворение,

12 аз предам вас под мечь, вси закланием падете: яко звах вас и не послушасте, глаголах, и преслушасте и сотвористе лукавое предо мною и яже не хотех избрасте.

13 Сего ради тако глаголет Господь: се, работающии ми ясти будут, вы же взалчете: се, работающии ми пити будут, вы же возжаждете:

14 се, работающии ми возрадуются, вы же посрамитеся: се, работающии ми возвеселятся в веселии сердца, вы же возопиете в болезни сердца вашего и от сокрушения духа восплачетеся.

15 Оставите бо имя ваше в насыщение избранным моим, вас же избиет Господь: работающым же мне наречется имя новое,

16 еже благословится на земли, благословят бо Бога истиннаго: и кленущиися на земли клятися будут Богом истинным, забудут бо печаль свою первую, и не взыдет им на сердце.

17 Будет бо небо ново и земля нова, и не помянут прежних, ниже взыдут на сердце их,

18 но радость и веселие обрящут на ней, яко се, аз творю веселие Иерусалиму и людем моим радость.

19 И возвеселюся о Иерусалиме и возрадуюся о людех моих, и ксему не услышится в нем глас плача, ни глас вопля,

20 ниже будет тамо младенец, ни старец, иже не исполнит лет своих: будет бо юный ста лет, умираяй же грешник ста лет и проклят будет.

21 И созиждут домы и сами вселятся, и насадят винограды и сами снедят плоды их.

22 Не созиждут, да инии вселятся, и не насадят, да инии снедят: якоже бо дние древа жизни, будут дние людий моих: дела бо трудов их обетшают.

23 Избраннии же мои не имут трудитися вотще, ниже породят чад на проклятие, яко семя благословено есть Богом, и внуцы их с ними будут.

24 И будет, прежде неже воззвати им, аз услышу их, еще глаголющым им, реку: что есть?

25 Тогда волцы и агнцы имут пастися вкупе, и лев яко вол снесть плевы, и змия землю яко хлеб: не повредят, ниже погубят на горе святей моей, глаголет Господь.

Глава 66

1 Тако глаголет Господь: небо престол мой, земля же подножие ногу моею: кий дом созиждете ми, и кое место покоища моего?

2 Вся бо сия сотвори рука моя, и сия суть вся моя, глаголет Господь. И на кого воззрю, токмо на кроткаго и молчаливаго и трепещущаго словес моих?

3 Беззаконник же жряй ми телца, яко убиваяй пса: и приносяй семидал, яко кровь свиную: даяй ливан в память, аки хулник. И тии избраша пути своя, и мерзости их, яже душа их изволи.

4 И аз изберу поругания их и грехи их воздам им: яко звах их, и не послушаша мене, глаголах, и преслушаша и сотвориша злое предо мною, и яже не хотех избраша.

5 Услышите глаголгол Господень, трепещущии словесе его: рцыте, братия, ненавидящым вас и гнушающымся, да имя Господне прославится и явится во веселии их, и они посрамятся.

6 Глас вопля от града, глас от храма, глас Господа воздающаго воздаяние сопротивящымся.

7 Прежде неже чревоболети ей, роди, прежде неже приити труду чревоболения, избеже и породи мужеск пол.

8 Кто слыша сицевое, и кто виде сице? аще родила земля с болезнию во един день? или и родися язык весь купно, яко поболе и роди сион дети своя?

9 Аз же дах чаяние сие, и не помянул еси мене, рече Господь. Не се ли, аз родящую и неплодную сотворих? рече Бог твой.

10 Веселися, Иерусалиме, и торжествуйте в нем, вси любящии его и живущии в нем: радуйтеся вкупе с ним радостию, вси елицы плакасте о нем,

11 да ссете и насытитеся от сосца утешения его, да ссавше насладитеся от входа славы его.

12 Яко сия глаголет Господь: се, аз укланяю на ня аки реку мира, и аки поток наводняемый славу языков: дети их на рамена взяты будут и на колену утешатся.

13 Якоже аще кого мати утешает, тако и аз утешу вы, и во Иерусалиме утешитеся

14 и узрите, и возрадуется сердце ваше, и кости вашя яко трава прозябнут: и познается рука Господня боящымся его, и запретит непокаряющымся.

15 Се бо, Господь яко огнь приидет, и яко буря колесницы его, воздати яростию отмщение свое и прещение во пламени огненне:

16 огнем бо Господним судитися будет вся земля, и мечем его всяка плоть: мнози язвени будут от Господа.

17 Очищающиися и освящающиися во вертоградех и в преддвериих ядущии мясо свиное и мерзости и мышы вкупе погибнут, рече Господь.

18 И аз дела их и помышление их вем, и гряду собрати вся народы и языки, и приидут и узрят славу мою:

19 и оставлю на них знамение, и послю от них спасеных во языки, во фарсис и в фуд, и в луд и в мосох, и в фовель и во елладу, и во островы дальния, иже не слышаша имене моего, ниже видеша славу мою: и возвестят славу мою во языцех,

20 и приведут братию вашу от всех язык дар Господеви, с коньми и колесницами и с носилами мсков, под сеньми во святый град Иерусалим, рече Господь, аки бы принесли сынове израилевы жертвы своя мне со псалмы в дом Господень:

21 и от тех поиму себе жерцы и левиты, рече Господь.

22 Якоже бо небо ново и земля нова, яже аз творю, пребывают предо мною, глаголет Господь, тако станет семя ваше и имя ваше:

23 и будет месяц от месяца, и суббота от субботы, приидет всяка плоть поклонитися предо мною во Иерусалим, рече Господь:

24 и изыдут и узрят трупы человеков преступивших мне: червь бо их не скончается, и огнь их не угаснет, и будут в позор всяцей плоти.

Книга пророка Иеремии

Глава 1

1 Слово Божие, еже бысть ко иеремии сыну хелкиеву от священник, иже обиташе во анафофе, в земли вениаминове,

2 якоже бысть слово Господне к нему, во дни иосии сына амоса царя иудина, в третиенадесять лето царства его,

3 и бысть во дни иоакима сына иосии царя иудина, даже до первагонадесять лета седекии сына иосии царя иудина, даже до пленения Иерусалимскаго в месяц пятый.

4 И бысть слово Господне ко мне глаголя:

5 прежде неже мне создати тя во чреве, познах тя, и прежде неже изыти тебе из ложесн, освятих тя, пророка во языки поставих тя.

6 И рекох: о, сый Владыко Господи, се, не вем глаголати, яко отрок аз есмь.

7 И рече Господь ко мне: не глаголи, яко отрок аз есмь, ибо ко всем, к нимже послю тя, пойдеши, и вся, елика повелю тебе, возглаголеши:

8 не убойся от лица их, яко с тобою аз есмь, еже избавити тя, глаголет Господь.

9 И простре Господь руку свою ко мне и прикоснуся устом моим, и рече Господь ко мне: се, дах словеса моя во уста твоя:

10 се, поставих тя днесь над языки и над царствы, да искорениши и разориши, и расточиши и разрушиши, и паки созиждеши и насадиши.

11 И бысть слово Господне ко мне глаголя: что ты видиши иеремие? и рекох: жезл ореховый (аз вижду).

12 И рече Господь ко мне: благо видел еси, понеже бдех аз над словесы моими, еже сотворити я.

13 И бысть слово Господне вторицею ко мне глаголя: что ты видиши? И рекох: коноб поджигаемый (аз вижду) и лице его от лица севера.

14 И рече Господь ко мне: от лица севера возгорятся злая на всех обитающих на земли,

15 зане се, аз созову вся царства земная от севера, рече Господь и приидут и поставят кийждо престол свой в преддвериих врат Иерусалимских и на всех стенах окрест его и на всех градех иудиных:

16 и возглаголю к ним с судом о всяцей злобе их, како оставиша мя и пожроша богом чуждим и поклонишася делом рук своих.

17 Ты же препояши чресла твоя, и востани и глаголи к ним вся, елика заповедаю тебе: не убойся от лица их, ниже устрашися пред ними, яко с тобою есмь, еже избавити тя, глаголет Господь: