Книга Иова
Глава 1
1 Человек некий бяше во стране авситидийстей, емуже имя иов, и бе человек он истинен, непорочен, праведен Богочестив, удаляяся от всякия лукавыя вещи.
2 Быша же ему сынове седмь и дщери три.
3 И бяху скоти его, овец седмь тысящ, велблюдов три тысящы, супруг волов пять сот, и ослиц пасомых пять сот, и слуг много зело, и дела велия бяху ему на земли: и бе человек оный благороднейший сущих от восток солнца.
4 Сходящеся же сынове его друг ко другу, творяху пир на кийждо день, споемлюще вкупе и три сестры своя, ясти и пити с ними.
5 И егда скончавашеся дние пира, посылаше иов и очищаше их, востая заутра, и приношаше о них жертвы по числу их, и телца единаго о гресе о душах их. глаголаше бо иов: негли когда сынове мои согрешиша и в мысли своей злая помыслиша противу Бога? тако убо творяше иов вся дни.
6 И бысть яко день сей, и се, приидоша ангели Божии предстати пред Господем, и диавол прииде с ними.
7 И рече Господь диаволу: откуду пришел еси? и отвещав диавол Господеви, рече: обшед землю и прошед поднебесную, се, есмь.
8 И рече ему Господь: внял ли еси мыслию твоею на раба моего иова? зане несть яко он на земли: человек непорочен, истинен, Богочестив, удаляяся от всякия лукавыя вещи.
9 Отвеща же диавол и рече пред Господем:
10 еда туне иов чтит Господа? не ты ли оградил еси внешняя его и внутренняя дому его, и яже вне всех сущих его окрест? дела же руку его благословил еси и скоты его многи сотворил еси на земли:
11 но посли руку твою и коснися всех, яже имать, аще не в лице тя благословит,
12 Тогда рече Господь диаволу: се, вся, елика суть ему, даю в руку твою, но самого да не коснешися. и изыде диавол от Господа.
13 И бысть яко день сей, сынове иовлевы и дщери его пияху вино в дому брата своего старейшаго.
14 И се, вестник прииде ко иову и рече ему: супрузи волов оряху, и ослицы пасяхуся близ их:
15 и пришедше пленителие плениша их и отроки избиша мечем, и спасохся аз един и приидох возвестити тебе.
16 Еще сему глаголющу, прииде ин вестник и рече ко иову: огнь спаде с небесе и пожже овцы и пастыри пояде подобне, спасохся же аз един и приидох возвестити тебе.
17 Еще сему глаголющу, прииде ин вестник и рече ко иову: конницы сотвориша началства три и окружиша велблюды и плениша их и отроки избиша мечьми, спасохся же аз един и приидох возвестити тебе.
18 Еще сему глаголющу, ин вестник прииде, глаголя иову: сыном твоим и дщерем твоим ядущым и пиющым у брата своего старейшаго,
19 внезапу ветр велик найде от пустыни и коснуся четырем углом храмины, и паде храмина на дети твоя, и скончашася: спасохся же аз един и приидох возвестити тебе.
20 Тако (услышав) иов, востав растерза ризы своя и остриже власы главы своея, (и посыпа перстию главу свою,) и пад на землю, поклонися (Господеви)
21 и рече: сам наг изыдох от чрева матере моея, наг и отиду тамо: Господь даде, Господь отят: яко Господеви изволися, тако бысть: буди имя Господне благословено (во веки).
22 Во всех сих приключившихся ему ничтоже согреши иов пред Господем, (ниже устнама своима,) и не даде безумия Богу.
Глава 2
1 Бысть же яко день сей, и приидоша ангели Божии предстати пред Господем, и диавол прииде посреде их предстати пред Господем.
2 И рече Господь диаволу: откуду ты грядеши? тогда рече диавол пред Господем: прошед поднебесную и обшед всю землю, приидох.
3 И рече Господь ко диаволу: внял ли еси убо (мыслию твоею) рабу моему иову? яко несть такова от сущих на земли: человек незлобив, истинен, непорочен, Богочестив, удаляяся от всякаго зла, еще же придержится незлобия: ты же рекл еси имения его погубити вотще.
4 Отвещав же диавол Господеви, рече: кожу за кожу, и вся, елика имать человек, даст за душу свою:
5 обаче посли руку твою и коснися костем его и плоти его, аще не в лице тя благословит.
6 Рече же Господь диаволу: се, предаю ти его, токмо душу его соблюди.
7 Изыде же диавол от лица Господня и порази иова гноем лютым от ногу даже до главы.
8 И взя (иов) чреп, да острогает гной свой, и той седяше на гноищи вне града.
9 Времени же многу минувшу, рече к нему жена его: доколе терпиши глаголя: се, пожду время еще мало, чая надежди спасения моего? се бо, потребися от земли память твоя, сынове твои и дщери, моего чрева болезни и труды, имиже вотще трудихся с болезньми: ты же сам в гнои червей седиши, обнощевая вне без покрова, и аз скитающися и служащи, место от места преходящи, и дом от дому, ожидающи солнца, когда зайдет, да почию от трудов моих и от болезней, яже мя ныне обдержат: но рцы глагол некий ко Господу и умри.
10 Он же воззрев рече к ней: вскую яко едина от безумных жен возглаголала еси? аще благая прияхом от руки Господни, злых ли не стерпим? во всех сих приключившихся ему, ничимже согреши иов устнама пред Богом (и не даде безумия Богу).
11 Услышавше же трие друзие его вся злая нашедшая нань, приидоша кийждо от своея страны к нему: елифаз феманский царь, валдад савхейский властитель, софар минейский царь: и приидоша к нему единодушно утешити и посетити его.
12 Увидевше же его издалеча, не познаша, и возопивше гласом велиим восплакашася, растерзавше кийждо одежду свою и посыпавше перстию главы своя:
13 седеша при нем седмь дний и седмь нощей, и никтоже от них возглагола к нему словесе: видяху бо язву люту сущу и велику зело.
Глава 3
1 Посем отверзе иов уста своя и прокля день свой,
2 глаголя:
3 да погибнет день, в оньже родихся, и нощь оная, в нюже реша: се, мужеск пол:
4 та нощь буди тма, и да не взыщет ея Господь свыше, ниже да приидет на ню свет,
5 и да приимет ю тма и сень смертная, да приидет на ню сумрак: проклят буди день той
6 и нощь оная: да постигнет ю тма, да не будет во днех лета, ниже да вчислится во днех месяцей:
7 но нощь оная да будет болезнь, и да не приидет на ню веселие и радость,
8 но да прокленет ю проклинаяй той день, иже имать одолети великаго кита:
9 да померкнут звезды тоя нощи, да ожидает и на свет да не приидет, и да не видит денницы возсиявающия,
10 яко не затвори врат чрева матере моея: отяла бо бы болезнь от очию моею:
11 почто бо во утробе не умрох? из чрева же изшед, и абие не погибох?
12 почто же мя прияша на колена? почто же ссах сосца?
13 ныне убо уснув умолчал бых, уснув же почил бых
14 со царьми и советники земли, иже хваляхуся оружии,
15 или со князи, имже много злата, иже наполниша домы своя сребра,
16 или якоже изверг излазяй из ложесн матерних, или якоже младенцы, иже не видеша света:
17 тамо нечестивии утолиша ярость гнева, тамо почиша претружденнии телом,
18 вкупе же в веце сем бывшии не слышат гласа собирающаго дань:
19 мал и велик тамо есть, и раб не бояйся господина своего:
20 почто бо дан есть сущым в горести свет и сущым в болезнех душам живот,
21 иже желают смерти и не получают, ищуще якоже сокровища,
22 обрадовани же бывают, аще улучат (смерть)?
23 смерть бо мужу покой, егоже путь сокровен есть, затвори бо Бог окрест его:
24 прежде бо брашен моих воздыхание ми приходит, слезю же аз одержимь страхом,
25 страх бо, егоже ужасахся, прииде ми, и егоже бояхся, срете мя:
26 ни умирихся, ниже умолчах, ниже почих, и найде ми гнев.
Глава 4
1 Отвеща же елифаз феманитин, глаголя:
2 еда множицею глаголано ти бысть в труде? тяжести же глагол твоих кто стерпит?
3 аще бо ты научил еси многи и руце немощных утешил еси,
4 немощныя же воздвигл еси словесы, коленом же немощным силу обложил еси.
5 Ныне же прииде на тя болезнь и коснуся тебе, ты же возмутился еси.
6 Еда страх твой есть не в безумии, и надежда твоя и злоба пути твоего?