Посем глаголет, начинаяи лик:
О! Пресвятая Госпоже Владычице Богородице Всемилостивая, моли Бога о нас грешных.
И творим метание на кииждо стих. И другии лик той же стих глаголет. Наченыи же глаголет:
Вся небесныя силы, святии ангели и архангели, молите Бога о нас грешных.
Святыи великии Иоанне пророче и Предотече, Крестителю Господень, моли Бога о нас грешных.
Святии славнии апостоли, пророцы и мученицы, и вси святии, молите Бога о нас грешных.
Преподобнии и богоноснии отцы наши, пастырие и учителие вселенней, молите Бога о нас грешных.
Зде рцы святаго, его же есть храм.
Непобедимая и божественная сила, честнаго и животворящаго Креста Господня, не остави нас грешных, уповающих на Тя.
Боже, милостив буди нам грешным.
Егда же достигнем сего стиха: Боже, очисти грехи наша, и помилуй нас, глаголем его трижды.
Посем, Трисвятое, и поклоны обычныя (3).
По Отче наш. Молитва Исусова.
В понедельник и среду вечер, тропари сия глас 2.
Просвети очи мои Христе Боже, да некогда усну в смерть, да некогда речет враг мой: укрепихся нань.
Стих. Призри и услыши мя, Господи Боже мой.
Паки той же тропарь: Просвети очи мои Христе Боже, да некогда усну в смерть, да некогда речет враг мой: укрепихся нань.
Слава. Заступник души моей буди Боже, яко посреде хожду сетей многих. Избави мя от них, и спаси мя Блаже, яко Человеколюбец.
И ныне, Богородичен. Яко не имамы дерзновения, за премногия грехи наша, но Ты, Иже от Тебе рождьшагося, моли Богородице Дево. Много бо может молитва Матерня, на умоление Владыки. Не презри грешных мольбы Всечистая, яко милостив есть, и спасти могии, Иже страдати нас ради изволивыи.
Ины тропари, во вторник и в четверток вечер, глас 8.
Сия обои тропари пременяти чрез день.
Невидимых враг моих неусыпание свеси Господи, и окаянныя плоти моея неможение веси, Создавыи мя. Тем же в руце Твои предаю дух мой, покрый мя крилома Твоея благости, да некогда усну в смерть. И умнии мои очи просвети, наслаждением божественных словес Твоих, и воздвигни мя во время благопотребно, к Твоему славословию, яко един Благ и Человеколюбец.
Стих. Призри и услыши мя, Господи Боже мой.
Яко страшен суд Твой Господи, ангелом предстоящим, человеком вводимым, книгам разгибаемым, делом испытаемым, помыслом истязуемым. Кии суд будет мне, зачатому во гресех? кто ми пламень угасит? кто ми тму просветит? аще не Ты Господи, помилуеши мя Блаже, яко Человеколюбец.
Слава. Слезы ми даждь Боже, якоже древле жене грешнице. И сподоби мя омочити нозе Твои, яже мя от пути льстиваго свободившая и мvро благоухания Тебе приносити, житие чисто, покаянием ми стяжанно. Да услышу и аз благаго Твоего гласа: вера твоя спасе тя, иди в мир.
И ныне, Богородичен. Непостыдную, Богородице, надежду Твою имея спасуся, и заступление Твое стяжав Пречистая, не убоюся, но пожену враги моя, и побежду я, во едино оболкся, яко во броня, в кров Твой, и всемогущую Твою помощь. И моляся вопию Ти: Владычице, спаси мя мольбами Си, и воздвигни мя от мрачнаго сна, ко Твоему славословию, силою из Тебе воплотившагося Христа Бога.
Господи помилуй (40).
Слава, и ныне.
Честнейшую херувим (поклон един).
Именем Господним благослови, отче.
За молитв святых отец наших.
Аминь.
Таже, молитва Великаго Василия.
Господи, Господи, избави нас от всякия стрелы летящия во дни. И избави нас от всякия вещи во тме приходящия, приими жертву вечернюю рук наших воздеяние. Сподоби же нас и нощное поприще без порока преити, неискусныи от злых, и избави нас от всякаго смущения и страха, иже от диявола нам прибывающаго. Даруй душам нашим умиление, и помыслом нашим попечение, еже на страшнем и праведнем Твоем суде испытания. Пригвозди страсе Твоем плоти наша, и умертви уды наша сущия на земли. Яко да и сонным безмолвием, просветимся зрением судеб Твоих. Отими от нас всяко мечтание неподобно, и похоть вредну. Востави же нас во время молитвы, утвержены в вере, и преспевающих в заповедех Твоих, благоволением и благостию, единороднаго Сына Твоего, с Ним же благословен еси, и с пресвятым и животворящим Ти Духом, ныне и присно и во веки веком, аминь.
Приидите, поклонимся (трижды, и поклоны три).
Помилуй мя Боже, по велицей милости Твоей. И по множеству щедрот Твоих очисти беззаконие мое. Наипаче омый мя от беззакония моего и от греха моего очисти мя. Яко беззаконие мое аз знаю и грех мой предо мною есть выну. Тебе единому согреших и лукавое пред Тобою сотворих. Яко да оправдишися в словесех Своих и победиши внегда судити. Се бо в беззакониих зачат есмь и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом и очищуся. Омыеши мя и паче снега убелюся. Слуху моему даси радость и веселие: возрадуются кости смиренныя. Отврати лице Твое от грех моих и вся беззакония моя очисти. Сердце чисто созижди во мне Боже, и дух прав обнови во утробе моей. Не отверзи мене oт лица Твоего, и Духа Твоего Святаго не отыми от мене. Воздаждь ми радость спасения Твоего и Духом Владычным утверди мя. Научу беззаконныя путем Твоим и нечестивии к Тебе обратятся. Избави мя от кровий Боже, Боже спасения моего; возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел жертвы, дал бых убо; всесожжения не благоволиши. Жертва Богу — дух сокрушен: сердце сокрушенно и смиренно Бог не уничижит. Ублажи Господи, благоволением Твоим Сиона; и да созиждутся стены Иеросалимския. Тогда благоволиши жертву правде, возношение и всесожигаемая. Тогда возложат на олтарь Твой тельца.
Господи, услыши молитву мою, и вопль мой к Тебе да приидет. Не отврати лица Твоего от мене, вонь же день аще скорблю, приклони ко мне ухо Твое, вонь же день, аще призову Тя, скоро услыши мя. Яко исчезоша, яко дым дние мои, и кости моя, яко сушило сосхошася. Уязвен бых, яко трава, и изсше сердце мое, яко забых снести хлеб мой. От гласа воздыхания моего, прильпе кость моя плоти моей. Уподобихся неясыти пустынному, бых яко нощныи вран на нырищи. Забдех, и бых яко птица особящаяся назде. Весь день поношаху ми врази мои, и хвалящии мя мною кленяхуся. Зане пепел, яко хлеб ядях, и питие мое с плачем растворях. От лица гнева Твоего, и ярости Твоея, яко вознес низверже мя. Дние мои, яко сень уклонишася, и аз яко сено изсхох. Ты же Господи, во веки пребываеши, и память Твоя в род и род. Ты воскрес ущедриши Сиона, яко время ушедрити его, яко прииде время. Яко благоволиша раби Твои камение его, и персть его ущедрят. И убоятся языцы имене Господня, и вси царие земстии славы Твоея. Яко созиждет Господь Сиона, и явится в славе Своей. Призре на молитву убогих, и не уничижи моления их. Да напишутся сии в род их, и людие зиждемии восхвалят Господа. Яко призре с высоты святыя Своея, Господь с небесе на землю призре. Услышати воздыхание окованных, разрешити сыны умерщвенных. Возвестити в Сионе имя Господне, и хвалу Его во Иеросалиме. Внегда собратися людем вкупе, и царие работати Господеви. Отвеща ему на пути крепости его, умаление днии моих возвести ми. Не возведи мене в преполовение днии моих, в род и род лета Твоя. В началех Ты Господи, землю основа, и дела рук Твоих суть небеса. Та погибнут, Ты же пребываеши, и вся яко риза обетшают, и яко одежду свиеши их, и изменятся. Ты же тожде еси, и лета Твоя не оскудеют. Сынове раб Твоих вселятся, и семя их в век исправится
Таже молитва Манасии, царя иудейска:
Господи Вседержителю, Боже отец наших, Авраамов и Исааков и Ияковль, и семене их праведнаго. Сотворивыи небо и землю со всею лепотою их, и сопныи море словом повеления Твоего. Затворивыи бездну, и запечатлев ю, страшным и славным именем Твоим. Его же вся боятся, и трепещут от лица славы Твоея. Яко непостоянна велелепота славы Твоея, и не стерпим гнев еже на грешники прещения Твоего. Безчислена же и неизследованна милость обещания Твоего. Ты бо еси Господь вышнии, милосерд, долготерпелив и многомилостив, и каяся о злобах человеческих. Но Ты Господи, по множеству благости Твоея, обеща покаяние и оставление согрешшим к Тебе, и множеством щедрот Твоих нарече покаяние грешником во спасение. Ты убо Господи Боже праведных, неси положил покаяние праведным Твоим, Аврааму и Исааку и Иякову, несогрешившим пред Тобою, но положил еси покаяние мне грешному, зане согреших Ти паче числа песка морскаго. Умножишася беззакония моя Господи, умножишася, и несмь достоин воззрети и видети высоту небесную, от множества неправд моих связан есмь многими юзами железными. Яко не возвести ми главы моея, и несть ми восклонения. Зане прогневах ярость Твою, и лукавое пред Тобою сотворих. И не сотворих воли Твоея, ни сохраних повелении Твоих. И ныне поклоняю колена сердца моего, и молю яже от Тебе благость. Согреших Господи, согреших, и беззакония моя аз свем. Но прошу и молюся Тебе: отради ми Господи, отради ми, и не погуби мене со беззаконьми моими. Ниже в век враждовав соблюдеши зол моих, и не осуди мене в преисподних земли. Зане Ты еси Боже, Бог кающихся, да и на мне явиши всю благость Твою, яко недостойна суща спасеши мя, по мнозей милости Твоей. И восхвалю Тя всегда, во вся дни живота моего. Яко Тебе поют вся силы небесныя, и Твоя есть слава во веки, аминь.