230. А промеж сел и деревень вотчинником и помещиком велети городьба городити пополам. А будет чьею городьбою в поле войдет какая животина, и от той животины хлебу учинится потрава и толока, и тот потравленой и пытолоченой хлеб велети платити исцом тому, чьею городьбою в поле животина войдет. А у кого у помещиков, или у вотчинников будут отхожие луги, а к тем лугам придет чья пашенная земля, и в тех местех меж лугов и пашни городьба городити тому, чья будет пашня. А будет тою его городьбою выдет на те луги его, или иного кого животина, и тот луг та животина вытолочит, и тое толоку платити тому, чья будет городьба.
231. А будет кто нибудь на государеве или на вотчинникове или на помещикове земле писцовую межу испортит и столбы вымечет, или грани высечет, или ямы заровняет, или землю перепашет, а по суду и по сыску про то сыщется допряма, и тех людей на спорных межах бити кнутьем нещадно, и бив кнутом, вкинути в тюрму на неделю, а исцу велети на нем взяти за всякую грань по пяти рублев, и велети межи и грани зделати и ямы выкопати попрежнему. А будет такое дело учинят крестьяне меж себя в одной волости, или в селе, и им за то по тому же учинити наказание, бити их кнутьем же, а межу и грань велеть зделати попрежнему.
232. А будет про такое дело сыскати будет нечем, и в том учинити вера, крестное целование. И будет в том деле крест поцелует истец, и ему велети на ответчике зе всякую грань доправити по пяти рублев, а наказания ему не чинити, а грани и всякия признаки учинити попрежнему.
233. А будет кто у кого насильством отымет землю или межи или грани переделает, а сыщется про то допряма, и у того, кто так учинит, та чюжая земля взяв отдати тому, у кого отнял, да на нем же доправити владенье по государеву указу, а за насильство учинити наказание, что государь укажет.
234. А будет где межи и грани заросли, и доведется их подновити, и о том учнет тот, чьи те межи и грани, бити челом государю, и потому его челобитью к тем зарослым межам и гранем послати дворянина добра, и велети те межи и грани подновити с старожильцы и со окольними людьми при обеих помещиках и при вотчинниках, меж чьими землями те межи и грани учинены, и велети те межи и грани написати в книге. А старых признак на тех межах портить не велети, чтобы впредь о том у помещиков и у вотчинников никакова спору не было.
235. А будет государевых дворцовых сел и черных волостей у крестьян земля будет смежна с патриаршими или с митрополичи, и с орхиепископли и епископли, и с монастырскими, или с поместными, и с вотчинными землями, и в таких смежных землях учинится спор, и про такия спорныя земли сыскивати писцовыми и дозорными и отделными книгами, и всякими крепостьми и старожилцы и окольными всякими людьми, на которых учнут слатися дворцовых сел и черных волостей крестьяне и вотчинники и помещики, и по сыску в таких спорных землях указ чинити, розводити те спорные земли с старожилцы по старым межам и граням.
236. А будет в таких спорных землях зачем указ учинити будет не мощно, и на таких спорных землях исцу с ответчиком учинити вера, образное хожение, а со образом велети итти тому, кому в суде дано будет на душю.
237. А будет на которых спорных землях будут старожилцы с обе стороны, и учинится у тех старожилцов промеж собою спор, одне старожилцы станут правити исца, а другие старожилцы станут правити ответчика, и на той спорной земле исцу с ответчиком дати жеребей, кому из них и против которыя старожилцовы скаски спорная земля с образом отвести, да кому вымется жеребей и тому та спорная земля с образом и отвести.
238. А будет кто помещик, или вотчинник похочет у себя в поместье или в вотчине на реке плотину зделати, и мелницу устроити вново, а береги оба тое реки будут его, а выше тое плотины у иных помещиков и у вотчинников на той же реке старых мелниц и пашенных земель и сенных покосов блиско берегов тое мелницы не будет, или и будет, да от тое новыя запрудные воды тем верхним мелницам и пашням и сенным покосом никакия порухи не будет, и ему та мелница вново строити вольно.
А будет на той же реке выше того у кого у иного устроены мелницы изстари, или блиско берегов тое реки подошли чьи пашенныя земли, или сенныя покосы, а от тое его новозапрудной воды тем прежним мелницам и пашням и сенным покосам будет поруха, и ему на той реке вново плотины не делати, и мелницы не строити. А будет он на том месте мельницу устроит насильством, и запрудною водою чьи верхние мелницы, или пашни, или сенные покосы потопит, и от того его насильства учинятся кому какие убытки, и в том на него будут челобитчики и с суда сыщется про то допряма, и ему велети воду опустити, чтобы верхним мелницам и пашням, и сенным покосам порухи не было. А что он кому тою новою мельницею учинит каких убытков, и те убытки по сыску велети на нем доправити, и отдати исцом сполна. А будет он тоя мелницы плотину приведет к чюжему берегу, и будут на него о том челобитчики же, и ему велети тое плотину от чюжаго берегу отрыти, и впредь ему плотины к чюжему берегу делати не велети.
239. А будет у кого бортныя ухожъи, или рыбные ловли, озера, или сенные покосы в государеве, или в помещикове, или в вотчинникове лесу, и тем людем теми своими бортными ухожъи, и озеры, и сенными покосы владети по старым межам, и сенных покосов за межею вново на чюжей земле не прибавливати. А будет те старые сенные покосы лесом заросли, и им те сенные покосы росчищати в своих межах, а за межами отнюд на чюжей земле лесу не росчищати, и сенных покосов не прибавливати. А будет в том лесу бортное его дерево повалится со пчелами, или безо пчел, и похочет он ис того дерева пчелы или улей безо пчел высечи, и ему те пчелы с ульем из лесу вывести вольно, а верховья и коренья оставити в лесу тому, чей тот лес, а бревен никаких, ни дров ис того чюжаго лесу не возити ни которыми делы, и в тот чюжой лес не вступатся, и своим лесом не называти. Такоже и тем людем, чей тот лес, чюжим бортным ухожъем, и рыбными ловлями, и сенными покосами, насильством не владети, и в те угодья не вступатся никоторыми делы.
240. А будет те люди, чей тот лес, похотят тот лес росчищати, и им росчищаючи тот лес, бортному деревъю никоторыя порухи не учинити. А будет кто лес росчищаючи, чюжое бортное дерево со пчелами, или безо пчол обсечет, или огнем обожжет, или будет кто чюжое бортное дерево у себя на поле на пашне сохою подпашет, и тем бортным деревьям поруху учинит, и в том на них будут челобитьчики, и с суда сыщется про то допряма, и на них велеть за то бортное деревье доправити указная цена и отдать исцом.
241. А будет кто свой лес весь росчистит и роспашет, а в том его лесу будут чюжие озера и сенныя покосы, и ему в те чюжия озера и в сенныя покосы по тому же не вступатися никоторыми делы, и тех людей, чьи те озера, или сенныя покосы, от тех озер и от сенных покосов не отбивать, и дорога им к тем угодьям дать. А тем людем, чьи те угодья будут, ходя к тем своим угодьям, пашни, и сенных покосов не топтати и никоторых убытков не чинити.
242. А будет кто в своем лесу чюжия озера выловит, или сенныя покосы покосит насильством, и в том на него будут челобитчики, и с суда про то сыщется допряма, и на нем велети исцу убытки доправити по сыску.
243. А у которых вотчинников и у помещиков по писцовым книгам будут бортные их ухожъи на их на поместных и на вотчинных землях, или у них по писцовым же книгам будут поверстные леса в их межах и в гранях, и тем вотчинником и помещиком те свои бортные ухожъи и поверстные леса в своих межах и гранях, которыя межи и грани написаны будут в писцовых книгах, вольно росчищати в пашню и в сенныя покосы, и села и деревни ставити.
244. А будет кто на ком учнет искати вотчины, или двора, или лавки, или мелницы, или иного чего вотчинного, или поместнаго строения, и ответчик засудяся с и(ы)сцом, и не дождався по судному делу указу, то, чего на нем истец искал, кому продаст, или заложит, а по суду и по сыску доведется его в том обвиняти, и у того, кому он что продаст, взяти и отдати исцу, а тому, кто у него то купил, указати на нем по купчей и по закладной цене назадь деньги. А будет в таком иску доведется по суду и по сыску ответчика оправити, а исца обвинити, и у купца того, что ему ответчик продаст, или заложит, не отъимати.